خواطر مسجون

من | Ikhwan Wiki | الموسوعة التاريخية الرسمية لجماعة الإخوان المسلمين |
اذهب إلى التنقل اذهب إلى البحث
خواطر مسجون
الجزء الأول


تأليف سعد سرور كامل

تقديم

سمعتها قبل أن أقرأها، سمعتها يترنم بها الأخ/ أحمد حسين- أطال الله حياته- في شدو رخيم، ورددتها بيني وبين نفسي، قبل أن أتصفحها على الأوراق، سمعت رقة القلب، ونغمة الوفاء وفيض اليقين. إن شئت أن تقرأ زجلا، سهل الروي ممتنع الشبيه، زاخر بالمعاني الرقيقة ، لا ينبو عن الأدب ، ولا إسفاف في المعاني .. فإنك واجده هنا.

إن حلا لك أن تسبح في جو من الطهر، وأن تجوب مغاني الصبا، ومعاهد الشباب وحنكة الشيوخ، مع فئة آمنت بربها، فزادها هدى، فإنك هانئ معهم في جلال الذكريات .. هنا أيضا.

إن كنت من عشاق التاريخ الصادق في خطواته الثابتة على مسيرة أيام ضخام وساعات رطاب، فانهل من المعين الصافي .. هنا

لقد شاء الله لي – وله الحمد والمنة- أن أسعد هاتيك الساعات مع صاحب هذه الأهازيج، على رنات القلوب، في حلو النغم. ذوب العاطفة في ذهب الأصيل ، قطرات الندى تقبل الحسن النبيل، ترانيم السحر في جوف الليل الطويل، حلاوة النجوى في هدوء الصابرين، حنان الدعاء ممن ثنيات فؤاد الخاشعين، نفحات الرضا، وآلاء الهدى تحدوا الساعين إلى الله، الطالبين هداه، الآملين في جنة عرضها السموات والأرض أعدت للمتقين.

ولئن أضنت زنازين السجون أعصاب نزلائها، فقد أحالها سعد بن سرور إلى خلوات، يذكر فيها اسم الله كثيرا، ولئن أفزعت خطوات السجان أمن النائمين، فقد جعلها سعد نداء إلى التهجد في وحدة الليل البهيم .. تتهاوى معها صخور الجدران، وتتحطم أمامها أسوار الحديد، فلا حائل بينك وبين الدعاء ولا حجاب.

إنها في العرف أزجال، ولكني أراها دعاء، وأحسها وفاء، وأخلد إليها مناجاة النعيم، مع صلاة القانتين، وإخبات الراكعين، واقتراب الساجدين.

جلسات للعبادة، وبسمات القناعة، وإشراق المحبين، وآمال الطالبين، وابتهالات الضارعين، ترد بغي الظالمين، المحاربين لدعاة رب العالمين، صبروا وصابروا حتى جاء فرج الله، فوجدهم حيث هم لم يبدلوا ولم ينحنوا، وكان فضل الله عليهم عظيما.

كل هذا ستحياه وأنت تنتقل بين هذه الخمائل الوارفة الظلال، وأنت تسمو بدينك فوق الولد والأهل والمال ، ذهب من نفوسهم هيلمان الباطل، واستقر في قلوبهم يقين الحق، وتقضت أيام السجن منهم بين حب وصبر .. وصدق .. وحق – ويقين.

وهل بعد هذا من جزاء، وهل فوق هذا من رضاء؟ "وما كان الله ليتركم أعمالكم إن الله بالناس لرءوف رحيم" عمر التلمساني  ..

نشيد الكتاب

بعد أن انتقلنا إلى سجن الواحات الخارجة عام 1955 وبدأت حياتنا تميل إلى الاستقرار، بدت الحاجة إلى نشيد سهل العبارة نبدأ به أحفالنا العامة وحفلات السمر التي كانت تقام بين الحين والحين في هذا المنفى البعيد فنظمت هذا النشيد الذي سرعان ما حفظه وردده الإخوان.

- أفديك بروحي يا كتابي ومهجتي

أفديك بدمي وما ملكت ف دنيتي

- أنت دليلي ورمز مجدي وعزتي

واحفظ عهودط عمري ما أنسىبيعتي

- نورك هداية م السموات العلا

يهدي الحيارى بالآيات المنزلة

- فيك الزكا والحج والصوم والصلا

وشريعة نازلة للعباد مستكملة
أفديك بروحي يا كتابي

- نورت كل الدنيا من عهد النبي

وجمعت بين شامي ومصري ومغربي

- عزك ونصرك هم غايتي ومطلبي

وحدود شريعتك هي ديني ومذهبي
أفديك بروحي يا كتابي

- إحنا جنودك نحمي عهدك كلنا

ما نبتغي غير الثواب من ربنا

- والعمر كله تبقى ساكن قلبنا

مهما الأذى ولا المدى طول بنا
أفديك بروحي يا كتابي ...

- إيدك في إيدي يا أخي لبي الندا

هيا بنا نفتح ميادين الفدا

- نحمل في ايدنا أسمى رايات الهدى

نهدم حصون الظلم ونبيد العدا
أفديك بروحي يا كتابي

يا رب

- يا رب عبدك ببابك منكسر وذليل

هايم في حبك وحبك ما رأيت له مثيل

- جذبني نورك إليك يا مبدع التنزيل

ومهما أضحي في حبك برضه يبقى قليل

- يا رب اسمك مرطب قلبي ولساني

يا رب ذكرك مخف عني أشجاني

- يا رب أنت اللي باقي وكل شيء

فاني أحد وفرد وصمد مالك شريك تاني

- عايش وكلي أمل في رحمتك ورضاك

وان طال علي المدى أحيا في ظل هداك

- سميع وعالم بحالي في سماك وعلاك

رقيب علينا وسر الخلق كله معاك

- حبك في قلبي بيسري في كل أعضائي

ودمعي دايما يترجم عني أشواقي

- قدمت حبك على أهلي وأبنائي

يا للي في إيدك حياتي وكل أرزاقي

- حبك مخلي الحياة دايما في عيني ربيع

وطول ما حبي في حفظك عمره ما حيضيع

- سابح في نورك ونورك مكتمل وبديع

يا ريت في ساعة لقاك حبي يكون لي شفيع

- أنت أنيسي في وقت الضر والبأساء

وأنت جليسي في ساعة الشدة والضراء

- وأنت ملاذي في جو الفتنة والإغراء

وأنت وكيلي في عز البطش والإيذاء

- إن زاد في قلبي الشجن أدعوك بأسماءك

وان طال بي ليل الأسى ألجأ لأضواءك

- ذاكر وشاكر لأفضالك وآلاءك

وهمي في دنيتي أسعى لإرضاءك

- الكون مسير بأمرك والفلك دوار

لا شمس تدرك قمر ولا ليل يسابقه نهار

- والخضرة تحيي الأمل .. والفلك والانهار

يا خالق الأفئدة والسمع والأبصار

- وصفت نفسك يا ربي بالكرم والجود

وكل شيء نطلبه أو نشتهيه موجود

- وبين إيدينا نعم ما لهاش عدد محدود

تشهد على قدرتك يا حي يا معبود

- يا رب ثبت فؤادي وحصنه واحميه

واحييه بذكرك ونورك واسعده واهديه

- ومن شرور الفتن والابتلاء نجيه

أنت اللي طول الحياة والعمر ساكن فيه


السجن الحربي

- ملعون السجن الحربي

واللعنة شوية عليه

- جواه ياما شوفت مآسي

اسمعني حقولك إيه

- من أول يوم ودوني

ودخلت من البوابة

- نبابيت وبواني ف جنبي

مش عارف كل ده ليه
ملعون السجن الحربي

- ماسكين كرابيج في اديهم

غير اللي معاه خرزانة

- وشرار باين في عنيهم

وخدوني على الزنزانة

- تعبان من شدة ضربي

هلكوني ولاد الإيه
ملعون السجن الحربي

- رايحين جايين يؤذوني

والضرب معلم فيه

- وليلاتي بيصحوني

علشان يتسلوا عليه

- مش عارف إيه كان ذنبي

مش كان يقولولي عليه
ملعون السجن الحربي

- النوم بالليل نسيناه

صاحيين أيام وليالي

- حتى الأكل كرهناه

مقدرش أوصفلك حالي

- ولاحدض كان يعلم بي

إلا اللي تكالي عليه
ملعون السجن الحربي

- الصبح يجيبوا اللقمة

وشوية عدس قليل

- وغدانا حتة لحمة

يظهر من لحمة فيل

- قرفوني ف أكلي وشربي

مضطر وحاعمل إيه؟
ملعون السجن الحربي

- والمغرب حبة مية

ويقولوا عليها خضار

- وان قلت اتوصوا شوية

أتهزأ ليل ونهار

- أسكت وانا كاتم غلبي

وده أمر قدرت عليه
ملعون السجن الحربي

- الصبح نقوم من بدري

ونروح ع الدورة طابور

- ندخلها ونطلع نجري

وما زال فينا المحسور

- وان كنت اتلفت جنبي

يزغدني شاويش بايديه
ملعون السجن الحربي

- كان فينا اللي بيدوه

ميت جلدة ولا ميتين

- والأخ اللي يمدوه

يزحف باديه الاتنين

- كلام في السر يا صاحبي

تخطيط اتفقوا عليه
ملعون السجن الحربي

- ودوني السجن الحربي

اكمني من الإخوان

- وعشان ما أنا باعبد ربي

حدفوني على الليمان

- وان كان ده يا عالم ذنبي

أنا برضه مصر عليه
ملعون السجن الحربي

- اسلامنا غالي علينا

والروح في سبيله تهون

- واله الكون مراعينا

ولابد النصر يكون

- وساعتها يفرح قلبي

والظالم تبكي عنيه

- ملعون السجن الحربي

واللعنة شوية عليه

إلى ليمان طره

- على طره يا شاويش ودينا

أهو صدر الحكم علينا

- والسجن مع الأشغال

بكرة يتنفذ فينا

- علشان بنقول إسلام

ونصوم ونصلي تمام

- خلقولنا قضايا قوام

وسجونهم فاضت بينا
على طره يا شاويش ودينا

- رح نلبس بكرة حديد

في الرجل ما هش في الإيد

- ما تقول شان احنا عبيد

وشاويش السجن شارينا
على طره يا شاويش ودينا

- حا ننام ع البرش الليف

أنت اللي عليك تحمينا
على طره يا شاويش ودينا

- حا نكسر دبش وطوب

وده شيء وعد ومكتوب

- سائلين المولى يتوب

ويطهرنا ... ويهدينا
على طره يا شاويش ودينا

- حانشيل وي "الجمالة( )"

في البرد وفي القيالة

- ونشيل على قد الحالة

واللي خلقنا يقوينا
على طره يا شاويش ودينا

- الحمرة ( ) على الحجارة( )

والطلبة ( ) مع الكسارة( )

- بيشيلوا تراب وحجارة

وترابهم يعمي عنينا
على طره يا شاويش ودينا

- حنروح طوابير طوابير

ونشخشخ في الجنازير

- والشغل حيبقى كتير

والمولى فوق يراعينا
على طره يا شاويش ودينا

- ياخدولنا الصبح تمام

والعصر يقولك كام

- وتمر بنا الأيام

والكل يناكف فينا
على طره يا شاويش ودينا

- العدس الله يخليه

حانبات واحنصبح فيه

- ناكل ولا نشبع بيه

ويمكهم( ) ما يكفينا
على طره يا شاويش ودينا

- العدل يا رب خلاص

والظلم شريعة الناس

- والحر اتهان وانداس

والحال ما بقاش يرضينا
على طره يا شاويش ودينا

- حانجاهد بالأرواح

ونقضي العمر كفاح

- وايمانا أمضى سلاح

رح نهزم بيه أعادينا
على طره يا شاويش ودينا

مواويل في الليمان

- يا للي أنت عايش معايا في الليمان مسجون

- اصبر على بلوتك والشدة بكرة تهون

- إياك تطاوع شيطانك والشيطان ملعون

- اعبد إلهك وصلي الفرض في ميعاده

- دي الدنيا فانية – ونصر المؤمنين مضمون

- لك يوم يا ظالم تدوق الظلم وتقاسي

- ويبقى كاسك مرارة من مرار كاسي

- ظالم بطبعك وقلبك ع العباد قاسي

- لا عز دايم ولا الدنيا كمان بتدوم

- وبكرة حانفكرك يمكن تكون ناسي

- شيلني يا أحمد يا خويا الدبش شيلي

- وخف إيدك شوية ويا للا شهلني

- القطر واقف على المصلب ( ) ومستني

- والكل بحر ما حدش غيرنا متأخر

- قوام قوام بالعجل كسر وحملني

- كسر يا سيدي الطريحة وكتر الدبشات

- خلينا نشحن ونخلص م الخمس عجلات

- واملا المقاطف وشيل عده ( ) يا للا وهات.

- القطر قرب علينا والشاويش أهو جاي

- خلينا نخلص وهاتلي حتتين علاوات

- يا رب دايما رازقنا باللي (يعلم به) ( )

- ما حد عاد يقبله ولا حد بيحبه

- والفول مسوس ونايمة السوسة في قلبه

- واللحمة زي الكاوتش وجبنه زي الطوب

- واللي ما يرضى بكده ذنبه على جنبه


كسرنا حديد

- كسرنا حديد

كسرنا حديد

- دي بشرة خير

وفأل سعيد

- بقاله زمان

وعهد قديم

- ودمه تقيل

وشكله أليم

- حديد مبروم

تخين وشديد
كسرنا حديد

- تلات وقات

حديد مكبوس

- معلق فيك تقولشي جاموس

- ويوم تحذير

ويوم تهديد
كسرنا حديد

- ما تقلعهوش

نهار أو ليل

- بحجلات( )

تهد الحيل

- وإيه حايفيد

من التشديد
كسرنا حديد

- تنام وتقوم

ما بين رجليك

- وفين ما تروح

معلق فيك

- ولا تفوتهوش

دقيقة بعيد
كسرنا حديد

- بنمشي طابور

نشخشخ بيه

- وله أصوات

بشكل كريه

- ويوم ما انشال

دا يوم العيد
كسرنا حديد

- عيوبه كتير

وفيه إذلال

- ورمز بغيض

من الأغلال

- تشوف الناس

تقولش عبيد
كسرنا حديد

- ما صدقناش

في يوم ما لغوه

- وكل الناس

قوام قلعوه

- فرجها قريب

يا خويا سعيد
كسرنا حديد

- دي بشرة خير

على الإخوان

- وفضل كبي

من الرحمن

- دليل أفراح

ونصر أكيد
كسرنا حديد

صور من سجن الواحات

سجن الواحات أو معسكر الواحات كما كنا نسميه حيث كنا نقيم في خيام وليس داخل زنازين مغلقة .. هذا المعسكر كان بمثابة مجتمع متكامل يزخر بالحياة بكل مقوماتها ومتطلباتها – وكانت عين الزجل ترقب وتسجل عن قرب كل ما تقع عليه من صور ومناظر لا تخلو أحيانا من المرارة أو الفكاهة.

صالون الأسطى خضر

- شفت الصالون اللي جنب المكتبة موجود؟!

- والأسطى خضر العريض أبو عضل وزنود

- كل اللي يدخل ويحلق يعتبر مفقود

- ولما يخرج كأنه من جديد مولود

- يوم الحلاقة دا أصبح عندي يوم مشهود

- يقاسي غاية التعب من شدة المجهود

- ساعتين تلاتة وراسي في هبوط وصعود

- والعدة تاكل في شعري ودقني زي الدود

- يا رب هون علينا وجود بفضلك جود

جولة سريعة

- مريت في جولة سريعة مرة ع الإخوان

- لقيت مهندس – في طشت بيغسل القمصان

- وشفت عالم – بإيده بيغسل القروان

- والفرن رحته – وقلت اسأل عن الفران

- لقيته واحد مدرس .. والتقى العجان

- واحد محامي وعملوا معلمين جدعان

- وشفت ضابط معاه سكينة وبدنجان

- عمال يقشر – وهو فارس الميدان

- وشفت واحد موظف كان رئيس في ديوان

- ماسك مقشة بيكنس بيها كل مكان

- يا رب دي حكمتك ... وارزقنا بالإيمان

- وانصر عبادي وحقق دولة القرآن

المكتبة

- كتب مفيدة في قلب المكتبة ألوان

- أدب وفن وبلاغة وفلسفة وبيان

- وحديث عن المصطفى في غاية الإتقان

- ومجموعات قيمة تفسير من القرآن

- وم التاريخ القديم للفرس والرومان

- ومن علوم الفلك والبحث في الأديان

- ومن فنون القصص والحرب والميدان

- وشعر حافظ وشوقي تلقى أي ديوان

- وخمسة ستة اللي هم بيقروا م الإخوان

- وباقي كل الميتين في اللعب زي الجان

- وإمتى نعرف مقام العلم والعرفان؟

الحب والإيثار

- ياما سمعنا خطب في الحب والإيثار

- ودروس بتنقال لنا وشبعنا ليل ونهار

- وكتبنا فيها الصحف وتألفت أشعار

- وألف مرة سمعنا قصة الأنصار

- مع اللي هاجروا وفاتوا مكة للكفار

- لكن يا خويا الكلام ده مش شايفه له أثار

- زي اللي راح في الهوا عدى علينا وطار

- لأن فيه أمثلة وبيعملوها كبار

- مقدرش أقولك عليها واكشف الأسرار

- لا بد ننكر ذواتنا ونبقى ناس أطهار

- علشان ييجي لنا الفرج والنصر يا شطار

المطبخ

- مريت في كل الطلب مالقيتش فيها سخيف

- إلا المطابخ يا ساتر يا حفيظ يا لطيف

- الفول يعوز تنقية والسوس ده أمره خفيف

- والرز تخرج عنينا لما يبقى نضيف

- والعدس كله حصى عايز كمان تنضيف

- ويا ويلنا لو جاتلنا ملوخية للتقطيف

- الخرط وحده يا خدله نص يوم يا ظريف

- والبامية شايخة وتشبه للحبال الليف

- والكوسة دي معتقة وغنية ع التعريف

- لو كان بإيدي أنا .. مش أمر أو تكليف

- ما أروحشي تاني .. ولكن إيه بقى التصريف؟

الإشاعات

- إيدك في إيدي وياللا نحارب الإشاعات

- دي زي عدوى خبيثة تسري في الجماعات

- وكل كلمه بسيطة تنقلب حكايات

- وتبقى قصة طويلة تشبه الروايات

- وبعد عدة دقايق يعني في لحظات

- الكلمة تخرج وتتداول ما بين ميات

- وناس تصدق وناس بتعيش مع الخرافات

- وكل دي بلبلة بتسبب الهزات

- وحنا هنا مجتمع محتاج يقين وثبات

- أمانة بيني وبينكم .. اللي فات أهو مات

- ونبقى دايما نخللي بالنا من الجايات

مشكلة البساطي

- جاني (البساطي) وهو بالغضب مدفوع

- وقالي عايز زجل واخترت لك موضوع

- اكتب لي ع المكتبة حتة زجل مسجوع

- أحسن دا حالها النهارده حال ما هش مبلوع

- الأخ ياخد كتاب يرجع لنا مقطوع

- يا إما ناقص ورق أو فيه غلاف منزوع

- ويبقى عارف بإنه مدته أسبوع

- يروح يصهين .. وتأخير الكتب ممنوع

- وأبص ألقى كتاب من مطرحه مرفوع

- لا حد قاللي ولا حتى باين له رجوع

- وكل يوم أشتكي ولا فيش كلام مسموع

- فقلت طيب ... وسيبني أدرس الموضوع

- قالي اوعى تنسى يا صاحبي .. أصل أنا مفقوع

أين القباقيب !!

- حلينا كل المشاكل .. فاضل القباقيب !!

- هي اللي فاضلة ولازم نلقى حل قريب

- لأن دي مشكلة واضحة بشكل غريب

- وفيه في قلب المعسكر فرقة (للتهليب)

- قباقيب شباشب أهو زي القدر ما يجيب

- قبقابي يبقى في رجلي بعد لحظة يغيب

- شاريه ودافع شلن ولا ليش في لبسه نصيب

- وأفضل أدور عليه وأسأل فؤاد ونجيب

- وألف كل الخيام وادخله بالترتيب

- م الصبح بدري لغاية ساعة التشطيب

- الحق أقولك دي حاجة فاقت الأعاجيب

- م الصبح بدري لغاية ساعة التشطيب

- يا خوانا عيب الحاجات دي بطلوا الألاعيب

- ولا حانعمل فرق للبحث والتنقيب

- وكل من ينضبط ... يتحط (في التأديب)

النظافة

- معروف بإن النظافة أصل في الإسلام

- وحتى باب الطهارة أول الأحكام

- وديننا دين العمل مش دردشة وكلام

- ولما يأمر بشيء لازم نطيعه قوام

- وحنا نسيب الزبالة مكومة أكوام

- حتى الصفيحة بتاعتها تتركن أيام

- وناس في قلب الخيام جايبين فراخ وحمام

- والفرخة تاكل وتشرب جنبنا وتنام

- حرام عليكم يا ناس واحلف لكم دا حرام

- دا شيء يجيب المرض ويجيب لنا الآلام

- وامتى نرعى سلامة الصحة والأجسام؟

أزمات

- أيام نوفمبر بطولها كلها أزمات

- وكل ساعة تصادفنا مشكلة وعقبات

- خيم علينا الظلام في معسكر الواحات

- والنور علينا انطفى والعلة في الماكينات

- لا فيش بضايع بتيجي ونامت المبيعات

- ولا فيه فاصوليا ولا بسلة ولا وجبات

- والعدس نازل علينا في التلات أكلات

- والمية شحت وعطلت كلها العربات

- وكل لحظة يصلح سعد في الموترات

- حتى الرغيف انكمش أصبح تلات لقمات

- وزاد علينا كمان الأزمة في الجوابات

- وتمشي تسمع بودنك أعجب الإشاعات

- يا إخواننا واجب علينا نخلص النيات

- نصبر ونشكر ونرفع إيدنا بالدعوات

- وكل شدة كمان ربنا يبعت لنا الرحمات

- دا الفجر دايما يهل في آخر الظلمات

يعجبني

- يعجبني حاجات راح أقولها لكم

وحاجات رح أقولها ما تعجبشي

- خليكو معايا وخدوا بالكم

ونا برضك ناوي ما اطولشي

- يعجبني الواحد يتكلم

ويحاسب دايما في كلامه

- واتضايق م اللي بيتسرع

ولسانه ما يمسكشي زماه

- لو صادفت مرة وقابلكم

تقولوله كفاية ما تغلطشي

- خليكو معايا وخدوا بالكم

ونا برضك ناوي ما اطولشي

- يعجبني الشخص المتواضع

وتواضعه ف عزه وكراة

- واتضايق م اللي بيتكبر

على غيره ويعمل علامة

- لو صادفت مرة وقابلكم

تقولوله الكبر ما ينفعشي

- خليكو معايا وخدوا بالكم

ونا رضك ناوي ما اطولشي

- يعجبني الواحد يعرف

اتنين متخاصمين يصالحهم

- واتضايق م اللي بيتدخل

ويوقع ويفرق بينهم

- لو صادفت مرة وقابلكم

تقولوله يا سيدنا ما تفسدشي

- خليكو معايا وخدوا بالكم

ونا رضك ناوي ما اطولشي

- يعجبني اللي بيتقن شغله

وبيرضي في الصنعة ضميره

- واتضايق م اللي بيستهتر

والحمل بيرميه على غيره

- لو صادفت مرة وقابلكم

تقولوله عيب ما يكلفتشي

- خليكو معايا وخدوا بالكم

ونا برضك ناوي ما اطولشي

- يعجبني اللي يوفر قرشه

وبيقضي حاجاته الضرورية

- واتضايق م الشخص المشرف

في كيوفه وحاجته الكمالية

- لو صادفت مرة وقابلكم

تقولوله الدنيا ما بتدومشي

- خليكو معايا وخدوا بالكم

ونا برضك ناوي ما اطولشي

- فيه عندي حاجات رح أجلها

وحقولها في المرة الجاية

- على شرط اللي اتقال يتنفذ

ودا عهد عليكم وعليه

- كفاية عليكوا اللي أنا قلته

إياك نفتكره ما ننساهشي

- خليكو معايا وخدوا بالكم

ونا برضك ناوي ما اطولشي

إلى سجن المحاريق

- خلال عام 1959 بدأ نقل الإخوان من معسكر الواحات (الخيام) إلى سجن المحاريق وهو سجن مغلق (زنازين) وسمي باسم البلدة التي أنشئ فيها وهو يبعد عن المعسكر السابق بحوالي 25 كيلو مترا – وقد بني خصيصا للإخوان للتنكيل بهم وعزلهم عن العالم الخارجي وقد أقام الإخوان حفلا كبيرا في المعسكر ليلة الترحيل أنشد فيه الأخ أحمد حسين مع مجموعة كبيرة من الإخوان هذه الأنشودة التي جاءت في وقتها تماما.

- ع المحاريق ع المحاريق *** ربك بكرة يفك الضيق

- والله رجعنا للزنازين ***اوعى تكون مهموم وحزين

شد العزم وقول يا معين

- لف النمرة وياللا قوام *** واتقل واصبر ع الأيام

وابقى ف وقت الحق جريء

ع المحاريق

- تلبس أزرق أو دمور *** تلبس بفتة أو كستور

ما يهمكش ما دام مستور

- تعمل إيه بحرير أو خيش *** أهي سترة وهي لقمة عيش

والحبسة مافيهاش تزويق

ع المحاريق

- المؤمن خير على طول *** مهما الشدة تزيد وتطول

واوعى يكون قلبك مشغول

- سلمها لله ترتاح *** وف إيده هو المفتاح

يفتح لك من أي طريق

ع المحاريق

- اطمئن واسأل مولاك *** كن وياه حا يكون وياك

وبفضله دايما يرعاك

- الزم بابه ليل ونهار *** هو العادل والجبار

بيسجل وحسابه دقيق

ع المحاريق ... ع المحاريق

الوصول إلى سجن المحاريق

كان من الضروري بعد الوصول إلى سجن المحاريق يسجل الزجل هذه اللحظات التاريخية حيث كانت النفوس تزدحم بمشاعر التوتر والترقب لما هو آت وخصوصا بعد الانتقال من السعة إلى الضيق ومن الانطلاق إلى القيود.

- جينا المحاريق في سبيل الله

وده شيء مكتوب لازم نرضاه

جينا المحاريق

- الساعة اتناشر نص الليل

جه للمأمور أمر الترحيل

- وبسرعة قوام بدأ التعزيل

كان لسه الفجر ما بانش ضياه

جينا المحاريق

- بصينا لقينا العربيات

نقلتنا هناك عشرات عشرات

- ورفعنا ادينا بالدعوات

واثقين في الوعد بنصر الله

جينا المحاريق

- عدينا الواحة وخدنا طريق

بيوصل دوغري للمحاريق

- ووصلنا فريق من بعد فريق

والسجن الفاضي قوام مليناه

جينا المحاريق

- لفينا سجون أشكال والوان

من قنا لاسيوط والمنيا كمان

- وقضينا زمان جوه الليمان

والدبش يا خويا هناك شلناه

- صرفولنا سراير ولا أبراش

أهي زي لوكاندة بلاش في بلاش

- واتفتشنا ما اتفتشناش

أهو كاس بيدور ياما شربناه

جينا المحاريق

- الزنازين فتحوا الزنازين

أهو خدنا عليها شهور وسنين

- وضروري يا خويا نكون صابرين

والعبد عليه يشكر مولاه

جينا المحاريق

- إن زاد الحر ودمك فار

أتذكر جنبه عذاب النار

- وإن شفت القلب ف يوم احتار

آيتين تقراهم هم دواه

جينا المحاريق

- إن فت الأهل وعشت غريب

قرآنك هو أنيس وحبيب

- وبشدة يا خويا فرجها قريب

ومسير الغايب يوم تلقاه

جينا المحاريق في سبيل الله

وده شيء مكتوب لازم نرضاه

فوازير

1. خمس حروف كلهم

نعمة ونقمة سوا

المية دي خصمها

لكن حبيبها الهوا

2. نقطة مية بسيطة

نعمة من الرحمن

لكن رغم صغرها

عايش فيها إنسان

3. عيون تشوفهاولا تشوفك

وذكرها جه في القرآن

مليانة دايما بدموعها

لا م البكا ولا م الأحزان

4. ملازمك تمللي وسامع حفيفه

وطالع ونازل بكل انتظام

لا تقدر تحوشه ولو حشته مرة

حا تختم حياتك بأسوأ ختام

حاسب نفسك

انطلاقا من (ورد المحاسبة) وتذكيرا بالحديث النبوي الشريف ( حاسبوا أنفسكم قبل أن تحاسبوا وزنوا أعمالكم قبل أن توزن عليكم) قمت بصياغة معانيهما في هذه الأبيات التي كان ينشدها الأخ أحمد حسين بين إخوانه بتوقيع لطيف.

- حاسب نفسك أول بأول

واوعى تقول العمر طويل

- أجلك لما يحل ميعاده

ما ينفعشي معاه تأجيل

- حاسب نفسك ع اللي بتاكله

شوفه حلال أو أصله حرام

- واللي ف أكله ما بيدققشي

يكرة النار تشوي الأجسام

- لقمة حلال تغنيك وتفيدك

فيها حلاوة طعم جميل

حاسب نفسك

- حاسب نفسك ع اللي قلبك

واوعى تكون بتغش الناس

- ولا يكون اليأس مشاغلك

وأنت بتظهر كل حماس

- ربك عالم سرك كله

ولا بيخيلشي عليه تضليل

حاسب نفسك

- حاسب نفسك ع اللي ف ظنك

واوعى تظن بغيرك سوء

- وابقى اتبين قبل ما تحكم

ليه تتجنى على المخلوق

- افرض دايما حسن النية

على ما يبان لك منه دليل

حاسب نفسك

- حاسب نفسك ع اللي ف إيدك

ملكك ولا ملك الغير

- واوعى الشر تقرب منه

والزم بس طريق الخير

- خللي النفس تمللي غنيه

مهما يكون الرزق قليل

حاسب نفسك

- حاسب نفسك ع اللي جنيته

وي إخوانك طول اليوم

- صفي حسابك هنا في الدنيا

أصل حساب الآخرة تقيل

حاسب نفسك

ذكرى الهجرة

كان الإخوان في سجن الواحات يحتفلون بالذكريات والمناسبات الإسلامية التي يتوالى مرورها لا لمجرد الاحتفال فقط ولكن لالتماس العبرة والعظة التي تكمن في هذه الأحداث الكبيرة من خلال الكلمات والقصائد التي يتبارى فيها الخطباء والشعراء، وقد شاركت بهذا الزجل في أحد أعياد الهجرة.

- عبير زهور الأمل عطر نوادينا

ولحن طير الشجر جدد أمانينا

- صوت نسيم السحر ردد أغانينا

ونور جبين النبي نور ليالينا

- الأرض لبست زينتها والسما ألوان

والخضرة زي البساط السندسي الفتان

- والدنيا عيد النهار ده لأمة القرآن

جدد معاني الأمل والعزم والإيمان

- يا ذكرى هجرة محمد مرحبا بيكي

غمرنا نور اليقين من نور لياليكي

- الدنيا قامت بحالها اليوم تحييكي

وتحيي أسمى معاني التضحية فيكي

- يا هجرة المصطفى عدتي بأنوارك

ومر طيف الأمل يحكيلنا أسرارك

- مين اللي ينكر تاريخك ولا مقدراك

وف كل سيرة وتاريخ بنلاقي آثارك

- بنشوف على صفحتك أحداث ماليهاش مثيل

بيم ربيها الزمن ينقلها جيل ورا جيل

- صور فريدة في هدم الشرك والتضليل

وكفاح منظم لدفع الظلم والأباطيل

- بنشوف على صفحتك دعوة نبي مختار

دعا في مكة لدين الواد القهار

- وشاف فنون الأذى من عصبة الكفار

وظل صابر بكل العزم والإصرار

- اسأل سمية الشهيدة عن أذى الكفار

وسأل بلال الأمين كم حرقوه بالنار

- وسأل صهيب العظيم وسأل أخوه عمار

كما قاسوا واتعذبوا من عصبة الأشرار

- اسأل عليهم بطاح مكة وأحجارها

وسأل رمال الصحارى وصخرها ونارها

- وسأل شعاب الجبل في ليلها ونهاره

قصص تفوق الخيال في وصف أخبارها

- ما نفعش فيهم فنون الكي والتحريق

ما نعفش ضرب السياط والجلد والتعليق

- ما نفعش حرب التهم والكذب والتلفيق

ما نعفش عنف المطاردة وشدة التضييق

- نشوف على صفحتك أسياد يآخو عبيد

ربط ما بينهم رباط الحب والتوحيد

- إيمان متين البنا ما يزلزلوش تهديد

وحب عالي الذرى ما يزولشي تحت وعيد

- بنشوف على صفحتك روعة في بذل المال

صور سطور التاريخ تذكرها بالإجلال

- همم قوية وقدرت تكسر الأغلال

وتقيم حضارة عريقة خالدة ع الأجيال

- بنشوف على صفحتك دعوة هدى وإصلاح

ومؤمنين قدموا من أجلها الأرواح

- وكان سلاحهم إيمان ما لهمش غيره سلاح

وعاشوا طول عمرهم ما بين عمل وكفاح

- دعوة كريمة عزيزة منزلة للناس

دعوة لكل الشعوب ألوان على أجناس

- دعوة رحيمة ونور الحق فيها أساس

مبعوثه مفصلة من عند رب الناس

- دعوة وفيها العلوم والمعرفة عبادة

مصحف مقدس وسيف يحميه مع قيادة

- والكل سيد لا فيها عبيد ولا سادة

والتقوى ما تلقى غيرها زاد وزواده

- دعوة وفيها الغني مسئول عن المحروم

والحاكم المحترم في مستوى المحكوم

- دعوة وفيها الضمان لحماية الملظلوم

من ظلم واقع عليه أو حق له مهضوم

- دعوة وفيها حقوق المرأة مكفولة

وأمورها منتظمة بطريقة معقولة

- جاعلاها صاحبة رسالة وأم مسئولة

عن صنع أسرة وجيل في المرتبة الأولى

- دعوة وفيها قانون العرش والسموات

عشان ينظم حياة الفرد والجماعات

- دعوة وفيها الجهاد له أرفع الدرجات

وقوافل الشهداء أحياء ومش أموات

- فين الرسول الكريم يشهد مكان أسراه

صبح في إيد اليهود وعصابة الهاجناه

- وإزاي تراثنا المقدس راح وضيعناه

وازاي تاريخنا المجيد الغالي بددناه

- بتمر دايما علينا ذكريات أمجاد

نعمل شوادر كتير والكهربا تنقاد

- ونقول وتسمع خطب واللي انقرا ينعاد

والعبرة والموعظة بينا وبينها بلاد

- في البر والبحر بنشوف الفساد ألوان

وروسيا + أمريكا جاي منها طوفان

- باعتين مذاهب عشان يقضوا على الإيمان

ويضلوا عقل البنات ويجننوا الشبان

- إيمان بغير العمل يصبح إيمان مبتور

ويبقى يشبه شجر من غير فروع وجدور

- واجبنا نبقى مشاعل للهدى والنور

ما دام نادينا بشرع الله يكون دستور

- ما هش حكاية كلام نفضل نعيد ونقول

ما هش آمال في الهوا وكلام جميل معسول

- إذا ركب ماشي وماشي والطريق حيطول

أما الشهادة يا أما نصرنا المأمول

- يا رب واقف ببابك في خشوع وخضوع

والقلب كله ندم والعين ملاها دموع

- جايلك بتوبة نصوحة ليس فيها رجوع

تغفر ذنوبي وجود بالعفو للمجموع

- يا رب أنت الملاذ والملجأ المأمول

واللي جرالنا ف سبيلك أو حا يجرى يهون

- ما دام ينبغى رضاك ما يهمش اللي يكون

دا الملك في قضبتك والعبد إيه حايكون

محلاها والله الزنزانة

كان الظالمون يتفننون في التضييق علينا والبطش بنا وكانوا يتعمدون حشر أكبر عدد من الإخوان في زنزانة ضيقة بحيث لا يجد الأخ مكانا لنومه – كما كانوا يسحبون البطاطين وأحيانا الأبراش وتغلق الزنازين بصفة دائمة سوى فترات خاطفة لقضاء الحاجة.. ورغم هذا وغيره كان الإخوان يتغنون بهذه الأنشودة (أداء جماعي وأصواتهم تدوي داخل الزنازين وخارجها تخرق آذان الظالمين)

- محلاها والله الزنزانة

مزنوقة ولكن سايعانا

- والقعدة فيها عجبانا

وقلوبنا سعيدة وفرحانة

- النومة على الأبراش حلوة

وبقينا مع الله في الخلوة

- وكتاب الله أجمل سلوى

وآياته تنور دنيانا
محلاها والله الزنزانة

- فتحوها ولا قفلوها

أجسامنا الفانية ياخدوها

- وقلوبنا مش رح يطولوها

وحاتفضل بالله عمرانة
محلاها والله الزنزانة

- قافلينها علينا وحابسينا

فاكرين آل يعني مضايقنا

- كانت نار تصبح جنة

طول ما حنا بنعبد مولانا
محلاها والله الزنزانة

- النسمة تمر تنعشنا

والنكتة الحلوة تفرفشنا

- وكفاية معان رغيف عيشنا

من غير ما نغمس يكفانا
محلاها والله الزنزانة

- صابرين ع المحنة وشدتها

راضيين بالحبسة وقسوتها

- مسيرها حاتفرج آخرتها

ونفارق وش السجانة
محلاها والله الزنزانة

- يا رب بعدلك عدلها

والحالة المايلة تعدلها

- ويا رب كمان ما تطولها

ونلاقي البشرى جيانا
محلاها والله الزنزانة

أنشودة رمضان

- رمضان أهو هل هلاله

يا حلاوة النور يا جماله

- والسعد أهو لاح

أهلا رمضان

- والكون أفراح

أهلا رمضان

- والقلب كمان غناله

هل هلاله...

- ضيف غالي وله مواعيده

ورسول من عند الله

- بيجيب الرحمة ف إيده

والدنيا بتستناه

- لياليه أنوار

أهلا رمضان

- كلها أسرار

أهلا رمضان

- والقلب كمان غناله

هل هلاله ...

- بيهل علينا بنوره

يآنسنا تلاتين يوم

- وبنسعد عند ظهوره

ونحس حلاوة الصوم

- شهر القرآن

أهلا رمضان

- شهر الإحسان

أهلا رمضان

- والقلب كمان غناله

... هل هلاله ...

- يا سلام على خير أيامه

من أول يوم بيزيد

- بيهني الروح بصيامه

وف آخره بييجي العيد

- شهر الخيرات

أهلا رمضان

- شهر البركات

أهلا رمضان

- والقلب كمان غناله

... هل هلاله ...

- في البيت والسوق والحارة

.. أفلاح ورايات وزينات

- والمسجد زي مناره

تهدينا للصلوات

- فيه التسابيح

أهلا رمضان

- وي التراويح

أهلا رمضان

- والقلب كمان غناله

... هل هلاله ...

- أيامه ما تتغوضشي

... واليوم بيساوي سنين

- وثواب الخير ما يضعشي

.. محلاه أجر الصايمين

- جنة وأنهار

أهلا رمضان

- ونجاة م النار

أهلا رمضان

- والقلب كمان غناله

.. هل هلاله ...

نشيد البيعة

بيعتنا وعهدنا

.. إسلامنا وشرعنا

نفديهم كلنا

.. بحياتنا ودمنا

أرواحنا ملك الله

وكتابنا احنا فداه

نسهر وبنات نرعاه

بجهادنا وعزمنا

قرآننا فيه النور

نازل للناس دستور

حندور مطرح ما يدور

ونصونه ف قلبنا

قرآننا فيه أحكام

يحكم بيها الحكام

نزلت للدنيا نظام

لهنانا وعزنا

قرآننا فيه عبادات

نعبد رب السموات

ونسبح بالدعوات

ونطهر نفسنا

قرآننا فيه إصلاح

وحياتنا جهاد وكفاح

ونجيب لجيوشنا سلاح

لحماية أرضنا

قرآننا نور وكمال

وفداه الروح والمال

وجهادنا مهما طال

فيه وعد بنصرنا

الله أكبر

- فكر بعقلك معايا في آيات الله

وشوف جلاله وكماله ورحمته المهداة

- وشوف جباله العظيمة وميته وهواه

وشوف نجومه الجميلة منورة في سماه

- تعالى نسبح سوى في صنعة الخلاق

ونشوف كمال قدرته في الخلق والإنشاء

- ونشوف بديع حكمته في قسمة الأرزاق

ونشوف لطيف صنعته في واسع الأرجاء

- الصبح تطلع علينا الشمس ييجي نهار

وتغيب وييجي المسا والليل دا فيه أسرار

- والنجم وي الكواكب في فلك دوار

والبدر ليلة التمام يغمرنا بالأنوار

- والأرض فيها النبات أشكال على ألوان

والخضرة زي البساط السندسي الفتان

- من كل زوج بهيج صنوان وغير صنوان

والزهر فوق الغصون والورد والريحان

- والفلك تجري في قلب البحر كالأعلام

تسير بأمره وتسري في أمان وسلام

- والكون بأرضه وسماه تمه في ست أيام

وبث فيه الدواب وسخر الأنعام

- والروح خلقها ما حدش يجلي أسرارها

والأرض هو اللي أجرى فيها أنهار

- والدنيا هو اللي نظم ليلها ونهار

نعم عديدة ما يقدر حد يحصرها

- وانظر لنفسك وشوف من أي شيء

مخلوق نطفة ومضغة ودم جوه عروق

- وعقل يقدر يميز كل خير أو سوء

منين ما تسعى بإذن الله تكون مرزوق

- وزوجة تسكن إليها وتنجب الأطفال

لأن زينة الحياة هي البنون والمال

- من عهد آدم وحوا سنة الأجيال

سبحانه مالك في إيده الرزق والآجال

- الله أكبر – وهوه الواحد القهار

الله أكبر وهو الخالق الجبار

- الله أكبر – وهو العادل الغفار

الله أكبر وهوه عالم الأسرار

- سلم أمورك إليه وانت تعيش مرتاح

الأمر أمره وهوه الرازق الفتاح

- والدنيا فانية ما تسوى م البعوضة جناح

أما الإيمان والعمل دول هم أمضى سلاح

نشيد الثبات

أمام ضغط السجن والنفي والحرمان قام بعض الأفراد الذين ضعفت عزائمهم بالدعوة إلى تأييد الحاكم ومفارقة الجماعة بغرض الإفراج والعفو عنهم ... وفي مواجهة هذه كان هذا النشيد الذي يدعو المسلم إلى الثبات على دينه والتمسك بدعوته.

- الثبات الثبات

يا اللي مسجون في الواحات

- ربنا بعدله ورضاه

رح يحل المشكلات

- اوعى عزمك يوم يلين

مهما حتطول السنين

- وانصر الحق المبين

بالعمل حتى الممات

الثبات الثبات

- ارض واقنع بالنصيب

بكرة تفرج عن قريب

- واللطيف المستجيب

بين إيديه المعجزات

الثبات الثبات

- اوعى تهرب من ماضيك

كله متسجل عليك

- شيل دموعك من عنيك

واوعى تندم ع اللي فات

الثبات الثبات

- اوعى تخلف بالعهود

ولا تلعب بالوعود

- يوم حسابك فيه شهود

كاتبه كل السيئات

الثبات الثبات

- اصبر الصبر الجميل

مهما حملك كان تقيل

- واوعى قلبك يوم يميل

ينخدع بالمغريات

الثبات الثبات

- دعوتك هي النجاة

صونها واوهبها الحياة

- دعوة من صنع الإله

شرعها سنة وآيات

الثبات الثبات

بين الجنة والنار

بين الجنة وبين النار

ليه الناس دايما تحتار

فكر حبة وشغل عقلك

شوفا لأحسن إيه واختار

خللي لسانك دايما طاهر

واوعى الغيبة ولحم أخوك

لما تقول الخير بلسانك

كل اخوانك حا يحبوك

تحفظ غيبته تروح الجنة

تنهش لحمه تروح النار

فكر حبة وشغل عقلك

شوف الأحسن إيه واختار

ربك حرم شرب الخمرة

اوعى يغرك حب الكاس

فيها ضياع للدين والصحة

غير ما تكسب سخط الناس

تبعد عنها تروح الجنة

تشرب منها تروح النار

فكر حبة وشغل عقلك

شوف الأحسن إيه واختار

لعب الميسر شيء متحرم

ليه بتضيع فيه المال

ياما بيوت عمرانة بتخرب

بيتك أولى بنص ريال

لما تقاطعه تروح الجنة

لما تزاوله تروح النار

فكر حبة وشغل عقلك

شوف الأحسن إيه واختار

كل حلال أهو واضح بين

واللي بيبقى حرام معلوم

ولا فيش عذر لواحد منا

ولا فيش أمر ما هش مفهوم

ترضى المولى تروح الجنة

تعصى أوامره تروح النار

فكر حبة وشغل عقلك

شوف الأحسن إيه واختار

بين الجنة وبين النار

أمة واحدة

الواحد عنصر أساسي من صميم الدين

والمسلمين الأول أمكنهم فاهمين

كانت صفوفهم سليمة وعاشو منتصرين

وكان بناء مجتمعهم متحد ومتين

في كل فرض شعيرة وركن في الإسلام

الوحدة عنصر حقيقي مش خيال وكلام

في الآيات الكريمة والشريعة نظام

يجعل حياة الأمم رحمة ونور وسلام

الرب واحد مالهش في العباد شريك

إن شاء يميتك وإن شاء الإله يحييك

ولما تمرض ما حدش غيره راح يشفيك

والرزق عنده وهوه بقدرته يكفيك

ورسولنا واحد محمد صاحب الأنوار

وحد قلوب أمته ع الحب والإيثار

بعث هداية وأمل للعالم المختار

وكان ختام الرسل – صلوا على المختار

وأمه واحدة بنص الآية في القرآن

من أندونسيا لمراكش كلهم إخوان

لكن حدود النهاردة مقسمة الأوطان

حدود صنعها الهوى والظلم والطغيان

ودينا واحد جمعنا تحت ظل الله

نؤمن بذاته ونشكر نعمته ورضاه

وكتابنا واحد نعزه ونحرسه ونرعاه

ونصونه ساعة الخطر ونضحي روحنا فداه

والقبلة واحدة بنقصدها خمس أوقات

نأدي فيها الفريضة ونحسن الصلوات

ونتجه كلنا ناحيتها في العبادات

بقلب واحد نناجي خالق السموات

وصيامنا واحد ودايما موعده رمضان

شهر المكارم وشهر البر والإحسان

نصوم ونفطر ونمسك كل شيء بأذان

رباط مقدس بيربط أمة القرآن

والحج واحد ووقته في السنة محدود

ولما ييجي الميعاد يا فرحة الموعود

والوقفة فوق الجبل موقف ويوم مشهود

لما الحجيج يفزعوا للواحد المعبود

ليه اختلافنا وليه ما نكونش متحدين

ليه اختلافنا ما دام الفرقة ضد الدين

ليه اختلافنا وحبل الله في إيدنا متين

ليه اختلافنا وفوق أراضينا محتلين

ليه اختلافنا ونبقى كلنا أحزاب

وننسى وحدة هدفنا ونجري خلف سراب

إيدك في إيدي ومرشدنا رسول الله

أحسن يا خويا الخطر واقف على الأبواب

أنشودة الإسراء

يوم الإسرا يا يوم الإسرا

يا للي قدومك فرح وبشرى

آنست وجيت وديك هليت

وحا توحشنا قوام من بكرة

طول العام قاعدين نستنى

ترجع تاني عشان نتهنى

يا للي هواك فيه ريحة الجنة

يملا قلوبنا بنور الذكرى

آنست وجيت وديك هليت

وحا توحشنا قوام من بكرة

في السموات اتنصبت زينة

لجل حبيب القلب نبينا

هوه رسولنا وهوه هادينا

وف أعيادنا بنلقى العبرة

آنست وجيت وديك هليت

وحاتوحشنا قوام من بكرة

طار من مكة يقابل ربه

والأشواق بتداعب قلبه

ربه دعاه علشان بيحبه

حيا وسلم عند السدرة

آنست وجيت وديك هليت

وحاتوحشنا قوام من بكرة

شاف النور بعنيه وتملى

نور على نور ومواكب هاله

رق عليه مولاه وتجلى

عند العرش بكلمة ونظرة

آنست وجيت وديك هليت

وحاتوحشنا قوام من بكرة

عاد للناس والصلا في يمينه

أكبر ركن في شرعه ودينه

جاية ملايكة معاه حارسينه

أصله رسول الدعوة الطاهرة

آنست وجيت وديك هليت

وحاتوحشنا قوام من بكرة

عيده يا رب بخير وسلامة

والإسلام في أعز كرامة

وادي النصر بانت له علامة

هاله علينا في يوم الإسرا

آنست وجيت وديك هليت

وحاتوحشنا قوام من بكرة

يا يوم الإسراء

إخواني

إخواني إخواني

دول أهلي وخلاني

أفديهم بعنيه

وحياتي ووجداني

القلب بيهواهم

مش ممكن يسلاهم

ون غابوا عن عيني

بيحن لذكراهم

أسماءهم على بالي

وصورهم في خيالي

والعيشة وياهم

تحلالي وتهنالي

حبني وحبيتهم

واحفظهم في غيبتهم

الشوكة اللي تصبهم

تتعبني وتتعبهم

والعهد اللي في قلبي

متوصل بقلوبهم

لا قرابة جمعتنا

ولا دنيا خدعتنا

والمولى اللي جمعنا

وربطنا بدعوتنا

الدنيا بتحسدنا

وتمللي تهددنا

وحانثبت ونكافح

بالحق اللي في إيدنا

البيعة نوفيها

نحفظها ونحميها

وضريبه قرآننا

بالدم نأديها

أرواحنا بعناها

ونفوسنا وهنباها

ورضينا بدعوتنا

بأساها وهناها

الدنيا وألاعيبها

فتناها لطلابها

والجنة الموعودة

رح نطرق أبوابها

حنادي بإسلامنا

ونحقق أحلامنا

ونهلل ونكبر

وترفرف أعلامنا

رح نسعى لأهدافنا

وحياتنا على كفوفنا

لا مشانق تثنينا

ولا سجن يخوفنا

يا رب تنجينا

من قبضة أعادينا

وتمكن لعبادك

في الأرض وتهدينا

تأييدك تأييدك

لجنودك وعبيدك

من غيرك ينصرهم

والملك ما بين إيدك

بتصرف وتدبر

وتبدل وتغير

وتعز المستضعف

وتذل المتكبر

رافعين لك شكوانا

مين غيرك يرعانا

ويقصر محنتنا

ويخفف بلوانا

حانرابط على بابك

وحانلزم أعتابك

يا رب ما تحرمنا

من نصرك وثوابك

يا رب

يا رب سبح بحمدك كل إنس وجان

وكل طير في السماء والزهر في البستان

وكل حب وثمر والنخل والأغصان

والنملة في حجرها والعشب في الوديان

والنحلة في ملكها والرعد والحيتان

بيسبحوا لقدرتك يا خالق الأكوان

وبيشكروا نعمتك يا عاطي يا منان

وبيسجدوا لعزتك يا رب يا رحمن

بشفاعة المصطفى سيد ولد عدنان

أرفع إليك شكوتي من قسوة السجان

شكوة أسير مضطهد بين أربعة جدران

مسجون عشان تهمتي جندي من الإخوان

بهتف بشرع السما والحكم بالقرآن

والعدل والمرحمة والبر والإحسان

قادر بفضلك يا ربي تهزم الطغيان

و الدعوة تاخد مكانها وتبقى زي زمان

يا رب علمك بحال مش لازم له بيان

أنت السميع العليم الواحد الديان

موكب الشهداء

شعر

شهداء ليمان طره

في أول يونيو 1957 وقعت مذبحة طرة المشهورة استشهد فيها 22 أخا فضلا عن المصابين وهم كثير وقد صدرت مؤلفات عديدة تناولت هذه الجريمة المنكرة بالتفصيل والتحليل أهمها كتاب للأخ الأستاذ جابر رزق وآخر للأخ الأستاذ مصطفى مصيلحي


شهداؤنا في جنة الأبرار

في ظل عرش الواحد القهار

وهبوا النفوس عزيزة وكريمة

لم يأبهوا بالظالم والجبار

خلعوا الحياة وقدموها قربة

لله لا للقرش والدينار

لم ينثنوا أو يستكينوا لحظة

رغم القيود وشاهق الأسوار

لم يرتضوا ذل الحياة وضيقها

شأن الأسود وشيمة الأحرار

لم يقبلوا عيش العبيد وذله

هذا لعمري مسلك الأطهار

ثاروا وللحر المكبل ثورة

مثل الجحيم شواظها من نار

صاحوا وللأسد المقيد صيحة

تدوي بسمع الكون كالإعصار

وقفوا لدفع الظلم أكرم وقفة

والقوم في لهو وفي استهتار

سهروا الليالي ينشرون فضيلة

وسواهمو متدثر بدثار

رفعوا اللواء وغيرهم في بيته

متستر من جنبه بإزار

كانوا الطليعة في الشدائد دائما

والناس في خوف وفي إدبار

أرواحهم فوق الأكف رخيصة

عند اللقاء ومقدم الأخطار

عاشوا لنصر الحق يبغون الهدى

في بعث شرع المصطفى المختار

يمشون بين العالمين كواكبا

فيها الهداية والهدى للساري

حفظوا العهود لربهم وتسابقوا

لجواره أكرم بخير جوار

صعدوا إلى الملأ الرفيع مكانه

في هالة درية الأنوار

يا رب ألحقنا بهم واغفر لنا

ما قد أصاب النفس من أوزار

أنت اللطيف المستجيب لدعوتي

أنت المقيل لزلتي وعثاري

سأظل أطرق باب عفوك دائما

حتى تجود وتقبل استغفاري

بتخاف م الناس

من وحي الآية الكريمة (يستخفون من الناس ولا يستخفون من الله وهو معهم) نظمت هذه الأبيات مستعرضا فيها الصور التي نراها كثيرا على مسرح الحياة والذكرى تنفع المؤمنين


بتخاف م الناس وبتتستر

وتداري مساوءك وعيوبك

ياخي مهما تفكر وتدبر

أهو ربك عالم بذنوبك

في ايديك أمانات بتبددها

ودي طبعا سرقة وخيانة

قدامنا نصون وورانا تخون

ياخي مهما تفكر وتدبر
أهو ربك عالم بذنوبك

في رقابتك أموال ليتامى

وعشان الناس مش شايفينك

بتبين عفة وكرامة

والنار بتقطع مصارينك

عايش في حرام على مال أيتام

ياخي مهما تفكر وتدبر
أهو ربك عالم بذنوبك

رمضان تتظاهر بصيامه

وتروح بيتك تتغدى

وتمر وتخلص أيامه

ولا ركعة منك ولا سجدة

ما تتوب لك يوم وتأدي الصوم

ياخي مهما تفكر وتدبر
أهو ربك عالم بذنوبك

بتبين للست بتاعتك

إخلاصك للعهد الغالي

وبتجرح في السر سيادتك

وتقضي مع غيرها ليالي

ورقيب وعتيد كتبوك عربيد

ياخي مهما تفكر وتدبر
أهو ربك عالم بذنوبك

تخطب ف الناس وتوجههم

وبتخدع غيرك بإيمانك

وبتعمل صالح قدامهم

ووراهم تتبع شيطانك

مكار ولعين لكن على مين

ياخي مهما تفكر وتدبر
أهو ربك عالم بذنوبك

حاتخبي إزاي ولا تداري

والمولى بيعلم أسرارك

مفتوح لك عنده حساب جاري

ومراقبك ليلك ونهارك

أحسن لك توب وكفاية ذنوب

ياخي مهما تفكر وتدبر
أهو ربك عالم بذنوبك

سلم أمرك لله

سلم أمرك لله

وبلاش من قولة آه

حاتروح من حظك فين

مطرح ما تروح تلقاه

الوعد دي شيء مكتوب

والذنب عليك محسوب

والعبد مادام مغلوب

طبعا يشكي لمولاه
سلم أمرك لله

لو جالك يوم جوابات

فيها دوشة أو خلافات

يا ما غيرها عدى وفات

والفكر يا شيخ انساه
سلم أمرك لله

إن كان أهلك هجروك

ولا صحابك نسيوك

أهو دول بالطبع فاتوك

علشان بيحبوا الجاه
سلم أمرك لله

السجن إن كان حيطول

ويوماتي عدس وفول

اصبر ياما بكرة تنول

كل اللي بتتمناه
سلم أمرك لله

لو كان لك مال سرقوه

أو كان لك دين نهبوه

كان مين في الناس دفنوه

والمال دفنوه وياه
سلم أمرك لله

الليل في نهايته شروق

ومسير الدنيا تروق

واعي تذل لمخلوق

وتروح له وتترجاه
سلم أمرك لله

أخ يودع أحد إخوانه عند نقله إلى سجن آخر

يا مسافر ما تاخدني معاك

دنا عمري عشته وياك

ياما بكرة توحشنا كتير

ويوماتي نحن لرؤياك

قضينا في السجن سنين

وحلفنا مع بعض يمين

وفضلنا صابرين راضيين

وطريقنا مليان أشواك
يا مسافر ما تاخدني معاك

جمعتنا راية الإسلام

وقاسينا في المحنة آلام

وهي كلنا ملح وعيش حاف

ولا كنا في الشدة نخاف

روح واحدةولا بيننا خلاف

وهوايا في الدعوة هواك
يا مسافر ما تاخدني معاك

حتقابل أغلى الأحباب

وتشوفهم من بعد غياب

والظالم لو قفل الباب

روح خبط على باب مولاك
يا مسافر ما تاخدني معاك

يا مسافر مليون سلامات

في رقبتك عهد وأمانات

وبندعي أغلى الدعوات

يرعانا المولى ويرعاك
يا مسافر ما تاخدني معاك

خلينا دايما ع البال

لا نفكر في ولاد ولا مال

دي الدعوة محتاجة رجال

والجنة مستنياك
يا مسافر ما تاخدني معاك

يا رب يا هادي يا رحمن

تجعلنا على طول إخوان

وتخللي راية القرآن

في إدينا ترفرف في سماك
يا مسافر ما تاخدني معاك

أبو العيال

مونولوج

دلوني يا ناس دلوني

ازاي راح اسد ديوني

دي عيال خلاص هوسوني

وقريب حا يجننوني
دلوني يا ناس دلوني

تسعة ومراتي معاهم

ودليلي احتار وياهم

ولا نافع أي تفاهم

ولا هم ف يوم عذروني
دلوني يا ناس دلوني

أنا راجل ليه وظيفة

وماهيتي لسه ضعيفة

بحسبها بالتعريفة

وسنين على ما يرقوني
دلوني يا ناس دلوني

الطبخة ما بتكفيهم

والحلة ما بتقضيهم

محتار ازاي أرضيهم

مش ناقش غير ياكلوني
دلوني يا ناس دلوني

الواد محمود وفهيمة

بيحبوا يروحوا السيما

ونا أصلي دقة قديمة

ون قلت بلاش يلوموني
دلوني يا ناس دلوني

عايزين أصواف وحراير

مرسومة خطوط ودواير

وأبات الليل ونا حاير

والنوم ما يزورش عيوني
دلوني يا ناس دلوني

في العيد أحتاس وأفكر

في الكحك أبو سمن وسكر

ون قلت بلاش أتكدر

وصغار وكبار يهينوني
دلوني يا ناس دلوني

الرفض مصيبة كبيرة

وضروري دقيق وخميرة

والبت نوال وسميرة

بيلحوا ويضايقوني
دلوني يا ناس دلوني

وف عيد الأضحى يحنوا

لخروف العيد ويزنوا

مقدرش أتهرب منه

لالقاهم يوم دبحوني
دلوني يا ناس دلوني

وف وقت دخول مدارسهم

تتعبني كتير ملابسهم

وكتبهم على كراريسهم

ويوماتي بيطالبوني
دلوني يا ناس دلوني

تلقى البقال على بابي

والخضري عم امبابي

ومعاهم كشف حسابي

وف وسط الناس فضحوني
دلوني يا ناس دلوني

يا ما نفسي يكون لي خزينة

وفلوسها تكفي مدينة

واسعد عيلتي المسكينة

والناس ييجوا يهنوني
دلوني يا ناس دلوني

يا رب حنانك بيه

بحبحها عليه شوية

وتزور جيبي النقدية

واسدد كل ديوني
دلوني يا ناس دلوني

ذكرى المولد النبوي

حبيت أعطر لساني ف مولد المختار

فقلت أكتب قصيدة لصاحب الأنوار

يمكن تخفف ذنوبي وتغسل الأوزار

ويكون شفيعي أمام الواحد القهار

أنوار بتسري وغامرة الدنيا بضياه

ونسمة حلوة قلوبنا بتسري وياها

وذكرى غالية في أهدافها ومعناها

هلت – وبدد ظلام الكون محياها

أفراح في قلب السما جبريل بيعلنها

وكل زاوية في عرش الله مزينها

بشرى جميلة ونور الحق عنوانها

طافت علينا بأنغامها وألحانها

أهدي إليك يا نبي باقة من الأزجال

يا للي مقالك ما فاتش لحد تاني مقال

اسمح لي أقدم فروض الحب والإجلال

تحي مني في عيد السعد والإقبال

يتيم وكان مولدك آية من الآيات

والأرض زادت هنا واهتزت السموات

وكان قدومك بشير اليمن والبركات

ولاح منار الأمل في حالك الظلمات

كانت حياتك تأمل في حياة الناس

لك عقل واعي ودايما مرهف الإحساس

كان الشباب وقتهم بين الهوى والكاس

وأنت لوحدك بتبحث عن إله الناس

الصدق كان من صفاتك وانت لسه غلام

والرحمة كانت في طبعك وحي أو إلهام

ولقبوك الأمين في سالف الأيام

من قبل عهد الرسالة ونعمة الإسلام


موصوف بحسن الخلق ومأدبك مولاك

يشهد بذلك كتابه والآيات ذاكراك

الروح بتعشق صفاتك والقلوب تهواك

ونور جبينك بيسبق مشيتك وخطاك

حليم وحلمك عريض ضاقت به السفهاء

عفيف وعفة لسانك يا رسولنا دواء

خطيب تهز المنابر سيد الخطباء

أمي ودانت بعلمك أمة العلماء

كريم وجودك سما في ذروته وعلاه

حق الفقير تضمنه وتبات عليه ترعاه

عادل في حكمك لأنه من قضاء الله

وحتى خصمك كمان كان يقبله ويرضاه

تغضب لباطل يقوم أو حق مرة يميل

وتثور ولكن لدفع الظلم والتضليل

وترضى لكن رضاك لله وللتنزيل

تغضب وترضى ووجهك منبسط وجميل

العهد عندك وفاء للصحب والأعداء

والكلمة منك أمان يتطمن الجبناء

والذمة عندي شرف بيتوج الشرفاء

والبسمة منك أمل في الشدة والسراء

رحيم بأهلك وبر بكل أبناءك

وزوج مثالي وفاض على الكل آلاءك

ملكت عرش القلوب من حسن أخلاقك

وكان بيوصل جمايلك بعض أعداءك

الحرب عندك شريعة في سبيل الدين

ورفع رايته الكريمة وسعي للتمكين

ما هش عشان اعتدا على أبرياء آمنين

لكن وسيلة لدفع الغدر والغادرين

قائد مظفر وغزوة بدر تشهد لك

والخيل في وقت النزال تخضع وتنقاد لك

فارس يخاف العدو في المعركة يتنازلك

حتى الملايكة بإذن المولى نزلت لك

العفو درة كريمة ف طبعك النادر

والعفو يبلغ مداه لما تكون قادر

وفتح مكة لعفوك كان دليل ظاهر

وأنت على الناقة داخل في انتصار باهر

سياسي ماهر وحاكم متزن ورشيد

ونظرتك للأمور تهدف لمرمى بعيد

والناس سواء أمامك سادة زي عبيد

وأكرم الخلق أهل التقوى والتوحيد

بعث رحمة وهداية لجل كل الناس

على اختلاف الملك ألوان على اجناس

معاك رسالة ونور الحق فيها أساس

تهدي الحيارى وتبقى للبشر نبراس

رسالة تصلح شئون الناس وأحوالهم

وصاله دايما لأولهم وآخرهم

فيها ضوابط تحدد كل أعمالهم

وفيها منهج يحقق كل آمالهم

فيها شريعة وقانون من خالق السموات

فيها قيادة ودعوة ومدرسة عبادات

فيها بلاغة وأدب وعلوم ومكتشفات

فيها ثقافة وحكم وشورى ومعاملات

فتحت بيها الممالك يا رسول الله

وحملت نور الهداية للي ضل وتاه

فين احنا منك ما فتنا الدين وضيعناه

وكل حاكم مشى على رغبته وهواه

الناس في غفلة وضلالة ويحرم الشهوات

والدنيا دي عندهم للمتعة واللذات

أما الفضيلة وأما العزة والكرامات

حاجات قديمة وموضة راح زمانها وفات

كل المعاني النبيلة قالوا عنها خيال

كل الغايات الشريفة صوروها ضلال

كل العادات الذميمة زينوها حلال

والأمر صار عندهم فرحة ولعب عيال

يجينا مولد النبي نعمل له حلويات

حصان وبطة وعروسة لابسة جوز غويشات

وتمر بينا الجموع بالطبلة والرايات

والشيخ مزوق حصانه بينثر البركات

فين الرسول الكريم يشهد حمى الإسلام

ويشوف شعوب العرب والمسلمين في خصام

عايشين حياتهم في ذلة ومسكنة وظلام

والنور في ايديهم بيهدي لكل خير وسلام

فين الرسول الحبيب فين هوه يا أحباب

يشوف شريعة السما مقفول عليها الباب

ويشوف كتاب ربنا مهجور ما لهش أصحاب

ويشوف جنود دعوته في أرضهم أغراب

في سيرة المصطفى أجمل عبر وعظات

في سيرة المصطفى أعظم خلق وصفات

في سيرة المصطفى وف تضحياته آيات

ما يستطيعشي الزجل يوصفها في أبيات

إن قلنا صدق النبي لازم نكون صادقين

ون قلنا عدل النبي لازم نكون عادلين

ون قلنا صبر النبي لازم نكون صابرين

ون قلنا شكر النبي لازم نكون شاكرين

ازاي نردد كلام ما ننفذوش أعمال

وازاي نطالب بشيء ما نحققوش في الحال

الدعوة دعوة عمل والدين لازم له رجال

تجعل مبادؤه حقيقة مش سراب وخيال

عايزين حياتنا تكون مصبوغة بالقرآن

ويكون تمللي العمل نابع من الإيمان

ما هش حكاية مقالة وخطبة ولا بيان

لكن معاني بتتحرك في كل مكان

عايزين يكون احتفالنا بمولد المختار

نحي الشريعة في قلب المدرسة والدار

ونعيش في ظل الهدى والحب والإيثار

ونبقى وقت المحن ناس مؤمنين وكبار

قولوا لشباب البلد يصحى من الأوهام

الدنيا صحيت ما حدش في الزمن ده ينام

قولوا له يبدأ جهاده لنصرة الإسلام

ويعيد مكانته ومجده ف سالف الأيام

قولو له يفتح عيونه دا الخطر حواليه

قولو له يعمل حسابه دي المؤامرة عليه

قولو له يحسم مشاكلة والعلاج في اديه

قولو له ينهض ويعرف فين مكان رجليه

الدنيا فيها صراع بين الأمم جبار

والمسلمين اختفوا وغابوا عن الأنظار

حرب المذاهب بتولد كل يوم أخطار

والكل في المعركة بين الحديد والنار

أمور يطول شرحها والوقت ما يكفيش

وحالنا بالشكل ده يا اخواننا ما يرضيش

إسلامنا هوه الدوا والشرع غيره مفيش

وسكة واحدة لنا وف غيرها ما نمشيش

قدامكو واجب كبير هل تقبلوا تأدوه؟

وآدي جيل الشباب هل تعرفوا تربوه؟

وف ايدكو مصحف كريم هل تقدروا تحموه؟

وهل صراع المذاهب تقدروا تواجهوه؟

يا صاحب الذكرى قلبي ممتلئ آلام

صعبان علي تهافت أمة الإسلام

لكن عاودني الأمل في عيدك البسام

نعيد زمان مجدنا ونحقق الأحلام

العهد بيننا وبينك نفتدي القرآن

بكل غالي ورخيص بالأهل بالولدان

ونعيش حياتنا جنود لشريعة الرحمن

في ظل نور الاخوة وقوة الإيمان

يا رب تشرح صدور الناس لقرآنك

واشمل عبادك بإكرامك وغفرانك

واحنا عبيدك ومحتاجين لإحسانك

دنيا وآخرة – وطعانين في رضوانك

سجن الواحات

يا سجن آخر زمن يا للي ملكش نظير 'زهقنا منك وشفنا فيك أسية كتير

لا فيك خضار ينطبخ ولا حتى عود جرجير 'حتى الدقيق اختفى ولا عاد يجينا سولار

والحبسة نشفت – الهي يدمرك تدمير

الجوع قاتلنا وبرضه يخفضوا التعيين 'والرز حبه حصى محسوبة في الموازين

والعدس تاكله كأنه مقلبه في الطين 'واللحمة قد الزبيبة وزيها في اللون

لا يوم شبعنا ولا عارفين نحاسب مين

يا أهل المطابخ كفاية شورية وبدنجان 'ولا غرضكم مؤامرة تقلبوها جنان

شوفولنا غير الفاصوليا الناشفة يا جدعان 'دي النفس ملت وبتطالبكوا بالتغيير

وشوفوا حبة خضار طازة في أي مكان

حب الدنيا

كتب هذا الزجل في وقت اشتدت فيه المحنة ومالت القلوب إلى متاع الدنيا وزينتها وزاد الجنوح إلى تأييد الحاكم الظالم طمعا في الخروج من السجن بالتماس الأسباب المهينة والأعذار الواهية – فسقط من سقط وثبت من ثبت بفضل الله وبرحمته.


ليه الدنيا بتجري وراه 'بكرة الدنيا تروح وتزول

فين الآخرة وله تنساها 'والله الجنة نعيم على طول

نشغل بالنا ونتعب حالنا 'لما القلب يولع نار

روق بالك وارضى بحالك 'بكرة الدنيا تروح وتزول

قاعد قايم صاحي ونايم 'حارق دمك في التفكير

واللي يصيبك هوه نصيبك 'مش رح تقدر ع التغيير

مهما حاتشكي ولا حاتبكي 'بكرة الدنيا تروح وتزول

دمك فاير دايما حاير 'ليه مستعجل ع الأيام

واللي خالقنا هوه رازقنا 'عينه لا تغفل ولا بتنام

روحنا ف إيده وحنا عبيده 'بكرة الدنيا تروح وتزول

متعة ظريفة ولا وظيفة 'ما تخليكش بسرعة تميل

اسمك عالي وعهدك غالي 'مهما تضحي برضه قليل

ليه تتغير أو تتحير 'بكرة الدنيا تروح وتزول

طمن قلبك وسأل ربك 'هو ف إيده مصير الناس

ولا تتألم ولا تتندم 'وامشي عزيز مرفوع الراس

كل بداية وليها نهاية 'بكرة الدنيا تروح وتزول

فين الآخرة وليه تنساها 'والله الجنة نعيم على طول

العلم

أول آيات أنزلت في العلم والتعليم

جبريل حملها لمحمد من حكيم وعليم

والعم في شرعنا شأنه جليل وعظيم

وله مكانه ، وعهده متصل وقديم

نزل رسول السما جبريل على المختار

وهوه قاعد لوحده معتكف في الغار

سهران يفكر في سر الخالق الجبار

ويجول بفكره في دنيا كلها أسرار

علم محمد علوم الكون وأوحاها

وقاله اقرأ وصار الأمي يقراها

وعاش رسولنا الكريم في ظل معناها

وكم نفوس ميتة بالذكر أحياها

آيات كتير نوهت بالعلم والعلماء

وكم آيات نددت بالجهل والجهلاء

والعلم سر الحضارة ومشرق الأضواء

يهدي نفوس البشر ويقوم الأخلاق

عندك حديث الرسول في العلم فرض أكيد

على كل راجل ومرأة آمنوا بالتوحيد

والعلم طبعا بيشمل أي علم جديد

يخدم قضايا البشر بعلاج ورأي سديد

من أرض مكة انبعث نور الهدى للناس

وكان شعاعه المقدس للبشر نبراس

والعلم يحيي النفوس ويهذب الإحساس

وسلاح في ايد الدول ما يخليهاش تنداس

اسأل سطور التاريخ عن دولة الإسلام

عن ازدهار العلوم في سالف الأيام

عن انتشار الفنون والقادة والأعلام

وعن صفاء العقول وسلامة الأفهام

كانت حضارة الدول من نور حضارتنا

كانت علوم الأمم من ضوء هدايتنا

كانت سعادة البشر من خير رسالتنا

كانت رياض الأدب من غرس فكرتنا

صبحنا من عجزنا خلف الصفوف سايرين

وصرنا من ضعفنا عن مجدنا لاهيين

وبتنا من جهلنا عن علمنا غافلين

وعشنا في وهمنا مستسلمين نايمين

باسم الحضارة المجيدة حرروا الأذهان

وبالرسالة الكريمة شيدوا البنيان

وبالشريعة العظيمة هبوا يا إخوان

يا للي وهبتوا الحياة للسنة والقرآن

سباق التسليح

يوم ذرية ويوم صاروخية

والملعونة الهيدروجينية

مخترعات تفني البشرية

أما صحيح دي عقول همجية

قد البيضة وتفني مدينة

وتخليها تراب في تراب

وسأل ناجازاكي وهيروشيما

من خلاهم أرض خراب

نار ودمار وأمور وحشية

أما صحيح دي عقول همجية

عملوا صاروخ بيطير في العالي

بيسموه عابر قارات

من نيويورك يروح طوالي

على موسكو ف عدة لحظات

نسف وهدم وكله أذية

أما صحيح دي عقول همجية

والطيارة اللي اخترعوها

أسرع في الطيران م الصوت

فيها مدافع لو فتحوها

ترمي الناس بالنار والموت

هي دي برضه يا ناس مدنية

أما صحيح دي عقول همجية

عملوا كمان غواصة جديدة

وآلاتها بالذرة تدور

تمشي ف ثانية مسافة بعيدة

وتعيش تحت المية شهور

ومركبة أسلحة سرية

أما صحيح دي عقول همجية

ملايين ضايعة ف حرب الذرة

والناس ضجت م الحرمان

فقر وجوع في الدول الصغرى

ويا ريت تسلم م العدوان

فين الرحمة والحنية

أما صحيح دي عقول همجية

زاد الشر وعدى حدوده

والخبراء في الشر كتار

أما الخير بتقل جنوده

ليه ما اعرفش ما لوش أنصار

والأباليس أهي رايحة وجايه

أما صحيح دي عقول همجية

أصل القوة صحيح محبوبة

تحمي الدولة من الأعداء

لكن برضه ماهش مطلوبة

تبقى سلاح ضد الضعفاء

ويعيشوا ف ذل وعبودية

أما صحيح دي عقول همجية

صحيح العلم سلاح بيموت

والناس شربت مر الكاس

والموازين في الدنيا اختلت

حطوا الرجل مكان الراس

ولما قابل جالوت أعوات جالوت فروا

والقلة كان من ثباتها عزته وفخره

وشوف كما يا أخي سيدنا إبراهيم

نزل بفاسه في أصنام العرب تحطيم

وشوف ثباته وهو بين نيران وجحيم

وربنا أخرجه منها بفضله – سليم

والسحرة لما قلوبهم سلمت لله

فرعون وعدهم ببطشه ونقمته وأذاه

قالوا آمنا بموسى واتبعنا هداه

وكان ثباتهم مثل في روعته ومعناه

وفيه كتير أمثلة تملا ديوان أزجال

فيها الثبات في المحن من شيمة الأبطال

يا رب ثبت قلوبنا وحطم الأغلال

قاصدين لبابك وبابك مشرق الآمال

حاتفَرّج

كانت هذه الأنشودة ردا على المتشككين المتخاذلين وتحديا للحاكمين الظالمين أردت بها غرس الأمل في القلوب وزف البشرى إلى النفوس .. قد حققت بفضل الله ما كنت أرجوه وأتمناه من تأثير طيب مفيد.


حاتفرج حاتفرج بإذن الإله

ونخرج وننعم بنور الحياة

يا قاعد لوحدك وقلبك حزين

ما تضحك شوية وسيب الأنين

دا ربك معانا وهوه المعين

ودايما شاملنا بعطفه ورضاه
حاتفرج ... حاتفرج

يا ساهر في ليلك تعد النجوم

وسارح بعقلك وكلك هموم

ما تسمع كلامي وفرفش وقوم

وخللي فؤادك يودع أساه
حاتفرج ... حاتفرج

يا شاغل جفونك بدمع العيون

وتاعب ضميرك بكتر الظنون

ما ترحم شبابك مسيرها تهون

ولازم نصيبك حياخد مداه
حاتفرج ... حاتفرج

بشوفك مكشر وبوذك طويل

وحاجبك معقد وهمك تقيل

ودايما مبوز وضحكك قليل

ما تطرد شيطانك وحارب هواه
حاتفرج ... حاتفرج

بتقلب دماغك في كل اللي فات

وسيرة اللي عايش وسيرة اللي مات

وفين العزيمة وفين الثبات

لسانك حياخد ثوابك وراه
حاتفرج ... حاتفرج

عيالك وأهلك في رحمة كريم

وهوه المسيطر وهو الرحيم

بيطعم ويسقي ويشفي السقيم

وعالم بحالنا وهو ف علاه
حاتفرج ... حاتفرج

في ذكرى الإسراء

هلت ليالي النور

والكون هنا وسرور

وف عالم الأسرار

غنت بنات الحور

البشر والأضواء

والأنس والأشواق

فاضوا على الملايين

في ليلة الإسراء

فوق صفحة السموات

اتنصبت الزينات

وملايكة الرحمن

في ذكر وابتهالات

والزهر في البستان

بيشارك الإنسان

فتح عنيه الحلوين

قبل الأوان بزمان

باعت لنا سلامات

وبيطلب الرحمات

ويهني كل الناس

في موسم النفحات

أهي مرت الأيام

والعام بيجري قوام


قوللي عملنا إيه

في خدمة الإسلام

سنين وراها شهور

واهو الفلك بيدور

والحق لسه ما زال

صاحب جناح مكسور

مالهشي صوت مسموع

ولا له علم مرفوع

ولسه فينا كتير

السلبي والمخدوع

المسلمين ملايين

وللأسف نايمين

عايشين في دنيا الغاب

بين الوحوش ضايعين

كانوا زمان أسياد

فتحوا وحكموا بلاد

ولما نسيوا الدين

بقى ذل واستعباد

هجروا كتاب الله

والركب طل وتاه

وكل حاكم راح

يغني على ليلاه

استوردوا القوانين

من موسكو على برلين

ون فكروا ف تشريع

يستلهموا الشياطين

قوانينا من باريس

صاغها اللعين إبليس

وف مجلس الأنساب

نطلع ولاد رمسيس

أفلام وتليفزيون

الأربعين مليون

بيربوا جيل عشاق

كالسم في الترياق

ولسه ميزانيات

مرصودة للسينمات

وبكرة الاستثمار

حايخش بالدولارات

وصحافة فيها كتير

م الكذب والتزوير

من فراشين الدار

لرئاسة التحرير

في كل صفحة سموم

وكلام خسيس مسموم


بيزيفوا الأخبار

وبيقبضوا المعلوم

صور تثير شهوات

تفتن بنين وبنات

والحق لو ينقال

ما بيلاقيش مساحات

وهي رجعت الأحزاب

وسمعنا تاني سباب

حتى الشيوعيين

فتحوا لهم الأبواب

بيعملوا اجتماعات

ويحرروا المقالات

وينشروا الإلحاد

والطعن في الديانات

مدارسنا فيها علوم

معظمها مش مفهوم

والناظر المفضال

لا يصلي ولا بيصوم

الدين ما لهش نصيب

عايش في أرضه غريب

وكفاية ع التلميذ

يطلع ولد حبيب

ومناهج التعليم

حالها النهارده أليم

لو قلنا تسوى كام

ما بتساويش مليم

والأزهر الغلبان

زاحوه عن الميدان

وسياسة التطوير

بتفتت البنيان


انشغلوا بالتفاهات

بالكادر والعلاوات

والدعوة للإسلام

ما بقاش لها اهتمامات

النصح للحكام

كان له زمان أعلام

وكان هناك علماء

في سالف الأيام

بيقولوا ما يخافوش

وياما هزوا عروش

ومن حروف من نور

لهم تاريخ منقوش

القدوة يا حضرات

مفقودة في القيادات

ومن كده بتزيد

مآسي الانحرافات

ما بتلاقيش مسئول

تصرفه معقول

عايش ما بين الناس

بشكل غير مقبل

مظاهر الإسراف

يعملها باستخفاف

وناس كتير حواليه

بتاكل العيش حاف

الشعب يعمل إيه

لما يشوف بعنيه

الرشوة والعمولات

والنهب من حواليه

المسلمين في ضياع

بينهم تمللي صراع

وميراثنا بددناه

والأقصى لوى وضاع

فتنا طريق الله

وكتابنا ده هجرناه

ومهبط الإسراء

مع عصبة الهاجناه

حفنة من العصابات

في قلة م السنوات

استوطنوا فلسطين

وبقت لهم حكومات

روحوا اسألو بيجين

ليه احنا مهزومين

حيقولكم على طول

من بعدنا ع الدين

بيقدس التوراة

واخدها نهج حياة

وعداؤه للإسلام

بعقيدة مش بهواه

آدي جنوب لبنان

احتل هوه كمان

ما كفاهمش سيناء

وغزة والجولان

من الفرات للنيل

دا ملك إسرائيل

والمسلمين بتنام

وتقولم على المواويل

بنقولهم إسلام

يقولوا لا ده كلام

ويبقى هوه النور

ويقولوا لا ده ظلام

عايزين سلام مع مين

دول قتلة محتلين

ما لهمش غير فرسان

داقوا حلاوة الدين

ما لهمش إلا جنود

أصحاب ذمم وعهود

وهبوا الحياة والروح

للواحد المعبود

والعزم والإيمان

ده سلاحهم القتال

ما لهمش إلا دعاه

يغزوا ف سبيل الله

ويحرروا فلسطين

من عصبة الهاجناه

كارتر ده يبقى مين

ما فيهمش حد أمين

ياما شبعنا دروس

م الأمريكان والروس

وف غضمنا الاتنين

بينخروا كالسوس

ما فيهمش حد صديق

وهدفهم التطويق

ما لناش سوى الإسلام

أضمن سبيل وطريق

هوه اللي فيه منهاج

ما يخليناش نحتاج

نستورد الخرافات

ونقول عليها علاج

دستور من الرحمن

يهدي بني الإنسان

صالح لأي مكان

نافع لأي زمان

ما تجربوه وشوفوه

وربما تحبوه

خدوه كأي نظام

ولو فشل تسيبوه

خدوه شريعة ودين

واسخرجوا القوانين

وقيموا حكم الله

رح تسعدوا الملايين

لحد إمتى تخاف

ونعيش تمللي ضعاف

بالاتحاد حنسود

بلاش خناق وخلاف

النار على الأبواب

وحنا ف خصام وعتاب

دا يرضي مين يا ناس

نسكت على الإرهاب

لا ذل لا استسلام

لا ضعف لا أوهام

لا سلم للأعداء

بل عودة للإسلام

ناموس مستشفى طرة

حلفتك بعنيك يا ناموس

اعتقني وخد مني فلوس

يا ما بسهر يا ناموس وياك

واتعرض بالليل لأذاك

لا بحبك ولا احب لقاك

يا بو شكة زي الدبوس
اعتقني وخد مني فلوس

لك زنة زي الدبور

وبتقرص زي المسعور

من قرصك دمي بيفور

يا ما خايف تنقل فيروس
اعتقني وخد مني فلوس

أنا بيني وبينك فيه إيه

وحياتك لتقولي عليه

حا صرفلك في الليلة جنيه

بس ابعد عني يا منجوس
اعتقني وخد مني فلوس

تتغدى وتتخن وتهيص

من دمي مهما ابقى حريص

ولا راضي تبطل تقريص

والقرصة أحمى من الموس
اعتقني وخد مني فلوس

ستزورني كل الأوقات

ولا فايدة في الناموسيات

ولا نافع أي احتياطات

ما تكونش مخبر ولا جاسوس
اعتقني وخد مني فلوس

أنا وأنت يا ناموس أعداء

ومؤكد فيه بينا عداء

لو شفتك في كل مساء

ينتابني نرفزة وعبوس
اعتقني وخد مني فلوس

بتجيني هايم مشتاق

بتزن ومليان أشواق

وعاملي زي العشاق

تقابلني تحضن وتبوس
اعتقني وخد مني فلوس

من دمي مصيت لترين

مصيتهم في حوالي يومين

ما تسيبني ياغراب البين

وكفاية إني أنا محبوس
اعتقني وخد مني فلوس

رح أجيب لك بروسول وفينك

وأرش الأوده ووريك

ون كان مش حيأثر فيك

بالجزمة حاضرب وأدوس
اعتقني وخد مني فلوس

تهنئة

إلى ابنتي فاطمة من داخل المعتقل

صحيت لقيت النهار أجمل من المعتاد

والشمس نورها الجميل عن كل يوم ازداد

سألت إيه الخبر؟ إيه السبب يا ولاد

قالوا لي فيفي وصلاح فيه عندهم أعياد

كتب الكتاب النهارده والفرح منصوب

وع الأحبة الضيوف حيوزعوا المشروب

فقلت والله النصيب فوق الجبين مكتوب

والمولى قادر بفضله يحقق المطلوب

مبروك يا فيفي الزواج من كل وجداني

مبروك عريسك صلاح دي الفرحة ملياني

والطير شاركني وجه ع الباب وناداني

غنا لي لحن الأمل والنور وهناني

الدنيا ضحكت لعيني بثغرها البسام

وفجر ليلي الطويل نور على الأيام

وطاف بشير الأماني يزوق الأحلام

وجه شعاع الأمل خدني لسنين قدام

طار بيه وي الزمن عدة سنين وشهور

شفتك عروسة جميلة جوه بيت مستور

ستايره هي الفضيلة والشرف والنور

وانتي في طهرك كواحدة من بنات الحور


شفت الستاير عليها زخرفة ونقوش

حققت فيها لقيت اسم الإله منقوش

والبيت بزهر المحبة والوداد مفروش

وبمية الورد وبعطر الإيمان مرشوش

شفتك يا فيفي انتي وصلاح في صلاه

واقف يصلي وواقفة يا حبيبتي وراه

عمال بيدعي وبتقولي أمين وياه

ظاهر عليكو الخشوع والامتثل لله

شفتك بعيني كمان بترتلي القرآن

والدمع نازل بيجري في خشوع وحنان

وصوت بيهتف بذكر الله في كل أذان

وانتي وصلاح في رضا بحلاوة الإيمان

شفتك في زي العفاف والطهر ماشية معاه

ولابسة تاج الفضيلة والعيون شايفاه

والناس بتغبط صلاح على فرحته وهناه

والمولى باعت ملايكة يبلغوكو رضاه

شفتك في إيدك عيال منهم بنات وبنين

بتعلميهم دروس حب الوطن والدين

ملبساهم كويس والولاد شاطرين

طالعين لابوهم – وزيك كلهم حلوين

صور كتير شفتها مرت كطيف وخيال

بأتمنى تصبح حقيقة وتبقى واقع حال


حاجات في وسع البشر ولا هية أمر محال

فيها الثواب العظيم م الواحد المتعال

أصل الزواج يا أحبة شركة بين أرواح

أساسها لازم يقوم ع التقوى والإصلاح

عشان تحقق هدفها وتكتر الأرباح

مش برضه رأيك معايا ولا إيه يا صلاح

وزي ما أنت بطل واقف في خط النار

تحمي بلادك ودينك من أذى الكفار

بيتك دا حصنك عليك تحميه من الأخطار

ويبقى دايما في راحة وأمن واستقرار

ألفين تحية وأجمل تهنئة ليكم

من كل قلبي أحييكم وأهنيكم

وكان بودي أدور بالكاس وأسقيكم

لكن قريب بإذن المولى حانجيكم

وأهدي التهاني إلى الوالدة العزيزة كتير

وتحية خاصة إلى محمد سرور وسمير

لهم جميل التهاني وأعظم التقدير

وللضيوف تهنئة حلوة وحب كبير

يا رب قادر بفضلك تفتح الأبواب

والصفو يرجع لنو الشمس بعد غياب

وعن قريب شملنا يتلم بعد غياب

واختم كلامي وقول عقبالكو يا عزاب

هيا بنا

ايدك في ايدي يا للا نبني مجدنا

عيدك وعيدي يوم ما نحيي شرعنا

النور معانا والمشاعل عندنا

والنصر وعد المؤمنين من ربنا
هيا بنا هيا بنا

الدنيا تايهة والعقول متحيرة

والشر زاحف ع النفوس الخيرة

عايزين بلادنا الإسلامية محررة

ونعيش أعزة بين ديارنا وأهلنا
هيا بنا هيا بنا

الشامي والسوداني وي التونسي

وابن العراق وابن الحجاز والفارسي

من أندونيسيا للمحيط الأطلسي

الدين جعلنا إخوة في الله كلنا
هيا بنا هيا بنا

دعوتنا فيها الحق والخير والهدى

وازاي شعوب المسلمين مستعبدة

لازم نكافح مهما طال بينا المدى

وبعزمنا نسعى لتطهير أرضنا
هيا بنا هيا بنا

دايما بنتباهى بماضينا اللي انتهى

وبأننا مهد الحضارة وأصلها

إمتى نشوف الدعوة ناشرة ظلها

ع الدنيا والأيام تحقق حلمنا
هيا بنا هيا بنا

الدنيا ضلت والأمل شرع السما

هو الهداية للنفوس المظلمة

فيه السعادة والرضا والمرحمة

وكفاية إنه جربوه من قبلنا
هيا بنا هيا بنا

نفض غبار النوم وهيا للعلا

واثبت وجودك في الساعات الفاصلة

واهتف ونادي بالشريعة المنزلة

وفداها أرواحنا وحياتنا ودمنا
هيا بنا هيا بنا

إشاعات الترحيل

ما أكثر الإشاعات داخل السجن ، وما أكثر تنوع موضوعاتها وتجيء في المقدمة إشاعات الترحيل التي كانت تنطلق بين وقت وآخر وحيث كانت السياسة الخبيثة تهدف إلى زعزعة استقرارنا، كما كانت تسعى إلى تصنيف الإخوان وعزل بعضهم عن بعض وتوزيعهم على السجون المختلفة للتأثير عليهم بأساليب الترغيب والترهيب.

ترحيل ترحيل ترحيل

سامعين إشاعات ترحيل

لو رحت ف سجن جديد

خد بالك واوعى تميل

مين عارف رايحين فين

والنقل دا جاي منين

ومسيرها يا خويا يومين

والصبر ده حلو جميل
ترحيل ترحيل ...

الغيب طبعا مجهول

مهما نخمن ونقول

وسأل أكرم مسئول

هوه اللي بعبده كفيل
ترحيل ترحيل ...

عهدك خليه منصان

في كل زمان ومكان

واتمسك بالقرآن

ولا ترضى بغيره بديل
ترحيل ترحيل ...

اوعى ف مرة يغروك

بكلام ويمضوك( )


والناس مهما اترجوك

خليك موزون وتقيل
ترحيل ترحيل ...

ادعيلنا ف كل صلاة

واحذر إبليس وهواه

وما دمنا نعيش لله

كل اللي يصيبنا قليل
ترحيل ترحيل ...

النصر على الأبواب

حا يشرف بعد غياب

ونروح للأحباب

وحاتفرح يابو خليل
ترحيل ترحيل ...

تهنئة عريس

بمناسبة زواج ابنتي منى( )

أيام أهي عمالة بتجري

والعمر بيجري وياها

والبنت النونو أهي بتكبر

وبتكبر أعمارنا معاها

عروستنا حكايتها عجيبة

أنا كنت سايبها في اللفة

وبقدرة قادر أهي كبرت

وهي قاعدة بفستان الزفة

كانت في العمر 9 أشهر

يوم هم ما جم واعتقلوني

ولا قدرت حتى تميزني

عندما حاكموني وسجنوني

أيام وسنين باعدت بينا

ونا عاجز أقدم شيء فيها

وبنام والخالق فوق منا

سهران يرعاها ويحميها

الظالم أصله كان فاكر

حرمانها مني يحطمها

مش عارف إن اللي خالقها

هوه حايسقيها ويطعمها

فين هوه الليلة وفين هيه

مين فيهم كسبان الجولة

أهو راح بمظالمه وجبروته

ولا نفعه السلطان والدولة

مبروك يا عروسة يا زراعية

مبروك يا عريس وهنيالكم

ربنا يرعاكو ويحرسكو

ونشوفكم سعداء بعيالكم

رح تبني يا عريس الأسرة

ونصيحة اسمعها ونفذها

أسسها الأول ع التقوى

حاتصون الأسرة وتحفظها

إسلامنا بيحكم خطاوينا

وبيرسم منهج لحياتنا

ليه دايرة حدودها معروفة

في داخلها بتكمل سعادتنا

الدنيا غروره وخداعة

وبريقها بيخطف أبصارنا

ورسولنا محمد بشريعته

مبعوث م المولى يبصرنا

قدامنا طريق ولا فيش غيره

مليان بالنور وبيهدينا

في الدنيا الفانية وفي الآخرة

هوه اللي أكيد حاينجينا

السكة واضحة ومعروفة

بتوصل لنعيم الجنة

على قد ما نتمسك بيها

حنعيش في سعادة ونتهنى

اوعى الأيام تلعب بيكو

والدنيا تاخدكو ف تيارها

تعاليم الدين حتأمنكم

من شر الدنيا وأخطارها

الدنيا مليانة مذاهب

صنعتها عقول البشرية

خليكو بعيد عنها وعيشوا

في ظلال الفكرة السماوية

الحاد ويقولوا اشتراكية

ويضلوا عقول الناس بيها

ومذاهب تانية أوربية

أفكار مسمومة كتير فيها

دي نصيحتي يوم كتب كتابكو

ودي أغلى من أي هدية

خللوها تمللي يا أولادي

دستور لحياتكو الزوجية

دي رسالة ولازم أبلغها

المولى أكيد رح يرضيها

مش عايز أطول وكفاية

ودي بعض ملامح للصورة

بأتمنى أشوفكم في سعادة

وحياتكو كريمة ومستورة

مش قادر أعبر بلساني

عن فرحة قلبي بعرايسنا

والدنيا احلوت في عنيه

والجمع الطيب مآنسنا

بشكركم يا للي شاركتونا

أفراحنا – عقبال مانجيكو

في زفاف أولادكم وبناتكم

ونقول أزجال ونهنيكو

ابدأ بنفسك

مقدرش أقول إن واحد يبقى م الإخوان

وله تصرف يخالف منهج القرآن

لازم نصحح سلوكنا ونضبط الميزان

ويكون ميزان العمل بالحجة والبرهان

ابدأ بنفسك وصلح كل عيب فيها

وشوف بعينك نواحي الضعف داويها

والزم حدود الشريعة والتزم بيها

واغرس معاني الكمال في النفس واحييها

إن كان لسانك بيفلت لجمه بلجام

واتعلم الصمت حبه مش ضروري كلام

خليك في حالك وقضي مدتك بسلام

والصمت نعمة وعبادة يحبها الإسلام

ون كان في نفسك هوى حكم كتاب الله

حارب شيطانك وغالب نزعته وهواه

ون كان في قلبك مرض في الذكر تلقى دواه

والجأ لربك ونور مجلسك بضياه

ون كنت صاحب نميمة كف عنها وتوب

معاك ملايكة بتحصي وكل شيء مكتوب

لإمتى نغفل ونفضل نرتكب في ذنوب

والحق واضح لنا وحنا اللي فينا عيوب

ون كنت حاسس بقلبك فيه نفاق ورياء

طهر فؤادك وقوم استغفر الخلاق

والبس ثياب الفضيلة وبردة الأخلاق

هي سبيل النجاة من فتنة الأهواء

ون كان إيمانك ضعف أو شاغلتك أفكار

جدد إيمانك وردد ورد الاستغفار

وادرس حياة الرسول ومجاهدته الكفار

وبين إيديك الآيات والسير والأخبار

ابدا بنفسك وضعفك أنت حاسس بيه

ابدأ بنفسك ونقصك كمله وداويه

ابدأ بنفسك وعزمك ثبته وقويه

وأي شيء تفقده لا يمكنك تعطيه

الدعوة دعوة مبادئ مش خطب وخيال

والدين أساسه العمل موش موعظة تنقال

عايزين في وقت المحن والشدة نبقى رجال

وتكون حياتنا مثل خالد على الأجيال

تهنئة عريس

مبروك يا عريسنا وبنحييك

وبكتب كتابك بهنيك
مبروك يا عريس

مبروك وكمان مليون مبروك

منى ومن كل اللي يحبوك

إخوانك جولك بيهنوك

والكل الليلة فرحان بيك
مبروك يا عريس

نقيت وظفرت بذات الدين

والزوجة الصالحة دي خير معين

ورباط الله دا حبل متين

الله يقويها ويقويك
مبروك يا عريس

يا ما كنت اليوم ده بتستناه

وزواجك حلم بتتمناه

وهو جه اليوم محلاه محلاه

وأكيد الليلة رح نرقيك
مبروك يا عريس

شوف كل الناس فرحانة إزاي

والرايح بيبارك للجاي

والفرحة كبيرة أوصفها إزاي

وهي باينة بترقص جوه عنيك
مبروك يا عريس

البسمة أهي مالية الدنيا بنور

وعيون الناس بتشع سرور

وزواجنا ده سنة وكاس بيدور

والساقي الليلة أهو جه يسقيك
مبروك يا عريس

حيكون لك أسرة وبيت وعيال

ربنا يرزقهم رزق حلال

وتعيشوا تمللي ف أسعد حال

والزوجة تعينك وتقويك
مبروك يا عريس

حصنهم دايما بالإسلام

حاتعيشوا ف خير وأمان وسلام

ولا قبله كلام ولا بعده كلام

إسلامنا فيه كل ما يعنيك
مبروك يا عريس

الدنيا مذاهب على أفكار

بتخلي عقول الناس تحتار

أفكار هدامة وفيها دمار

ولا فيش غير الإسلام يحميك
مبروك يا عريس

الحاد ويقولوا دي نظريات

واقتصاديات واشتراكيات

ويضلوا بيها المجتمعات

قايمة على فكر خسيس وركيك
مبروك يا عريس

دي رسالة وانت بقيت مسئول

مش متعة زي ما ناس بتقول

ودي زرعة لجل حياتها تطول

الشرع بيرويها ويرويك
مبروك يا عريس

إسلامنا فيه كل الضمانات

لحماية كل المجتمعات

ورعاية الأزواج والزوجات

ويسدد ع الأيام خطاويك
مبروك يا عريس

تأسيس البيت على تقوى الله

حايحقق ليكم أغلى حياه

وبناء الأسرة بشرع الله

حاينور كل طريق حواليك
مبروك يا عريس

مالناش مع حكم الله نختار

ولا لينا ف السنة خيار

والأمر صريح ولا فيش أعذار

والصدق مع الله حاينجيك
مبروك يا عريس

إسلامنا رسم للمرأة حدود

وظفتها الأولى تربي جنود

وده أمر خطير محتاج مجهود

ومؤكد رح تلمسه بإيديك
مبروك يا عريس

حاتخلف بكرة عيال وبنات

والأم عليها حاجات وحاجات

تربية ورعاية وتوجيهات

أما الإنفاق والصرف عليك
مبروك يا عريس

الأسرة دي شركة بين زوجين

ومودة ورحمة ما بين قلبين

لو راح تتعاونوا انتو الاتنين

رح تسعد بيها وتسعد بيك
مبروك يا عريس

اتجنب كل ما فيه إسراف

وابعد ع الدين ياما ذل آلاف

واللقمة إن شا الله تاكلها حاف

أفضل ما تبات فيه قرش عليك
مبروك يا عريس

ياما فيه في الدنيا كتير إغراء

وقناعة النفس أعز دواء

والرزق يا خويا على الخلاق

اللي بيعطيني وبيعطيك
مبروك يا عريس

رح أقولك إيه وأعيد لك إيه

وده كله سيادتك راسي عليه

والمعنى اللي أنا قصدت إليه

تذكير بحاجات خافية عليك
مبروك يا عريس

مبروك م القلب وم الوجدان

ولزوجتك ألف تحية كمان

ولكل الأسرة وللإخوان

مبروك يا عريس عيني باردة عليك
مبروك يا عريس

الإسلام في الجامعة

سيبوا شباب الجامعة سيبوه

ليه يا جماعة بتهاجموه

هي الدعوة للإسلام

تهمة تخليكو تحاربوه

ليه بتطاردوا الشاب المؤمن

لما يصلي ولا يصوم

ليه بتعدوا عليه حركاته

لما بيقعد ولا يقوم

ليه حاطينه ف وش المدفع

وبصواريخ قاعدين ترموه
سيبوا شباب الجامعة سيبوه

كلمة حق يقولها تثوروا

فيه أوضاع مش عايزة سكوت

يعني ينافق يعني يداهن

يعني يعيش إنسان هلفوت

ولا صراحته مش عجباكم

وانتو الأولى تحترموه
سيبوا شباب الجامعة سيبوه

لما يعدوا معسكر صيفي

يلقوا متاعب واعتراضات

لكن حفلة رقص ومغنى

تاخد دعم وتسهيلات

جيل الجامعة ده مستقبلنا

لازم بالإسلام تحموه
سيبوا شباب الجامعة سيبوه

بنت الجامعة مالكو ومالها

لما بتتمسك بالدين

لابسة الطرحة ومتغطية

إلا الوجه مع الكفين

ليه عايزينها متعرية

هوه الحقد ده مش تداروه
سيبوا شباب الجامعة سيبوه

هوه شباب الجامعة المسلم

ليه بيخوف بعض الناس

ليه عايزينه يعيش متحلل

ولا له نخوة ولا إحساس

مين رح يحمي الشرع الغالي

طول ما الكل بيضطهدوه
سيبوا شباب الجامعة سيبوه

سيبوا شبابنا يعيش إسلامه

يكفي مهازل وانحرافات

سيبوا بناتنا تعيش مستورة

يكفي فضايح يا حضرات

كلمة شر بلاش تقولوها

ون كان خير معلش قولوه
سيبوا شباب الجامعة سيبوه

فين الإسلام

فين الإسلام يا أهل الإسلام

وحاجات حوالينا حرام في حرام

نبهنا كتير ونصحنا كتير

ولا حد بيسمع لينا كلام

فين الإسلام والخمرة حلال

تجارتها مباحة ف كل مجال

بنشوف بعنينا بنات وعيال

سكرانة بترقص ع الأنغام
فين الإسلام يا أهل الإسلام

بتقدم ليه ويسكي ف حفلات

بتقيمها مصالح أو وزارات

وبندى رخص لبارات وصالات

فاتحنها معارض للأجسام
فين الإسلام يا أهل الإسلام

فين الإسلام والربا مشروع

مفروض بقانون ولا هش ممنوع

والشعب فقير وبيشكي الجوع

والفايدة بتكتر عام ورا عام
فين الإسلام يا أهل الإسلام

ولا واحد فينا ماهش مديون

90 في المية علينا ديون

ومنين حنلاقي صدر حنون

والبنك بياكل مال أيتام
فين الإسلام ...

فين الإسلام يا أهل التوحيد

والسرقة ف يوم عن يوم بتزيد


ولا شفنا حكومة بتقطع إيد

ولا قادرة بتقضي على الإجرام
فين الإسلام ...

المخزن بالمخزون يشيلوه

وحريقة تغطي اللي بياخدوه

ويداروا كمان ع اللي سرقوه

ويقولوا العهدة تمام في تمام
فين الإسلام ...

يا ما دايما نسمع عن صراف

اختفى ومعاه في جيوبه آلاف

وتمر الحادثة باستخفاف

ولا فيش تقدير للمال العام
فين الإسلام ...

فين الإسلام والزنا موجود

بقانون موضوع ومالهش حدود

تخطيط معمول لغرض مقصود

نابع من فكر خبيث هدام
فين الإسلام ...

فين الإسلام ونوادي قمار

فاتحة الأبواب ليل وي نهار

وبيوت بيصيبها خراب ودمار

على مرأى ومسمع م الحكام
فين الإسلام ...

فين الإسلام وادي السينمات

بتثير في الناس نار الشهوات

عري وإفساد – والغراميات

بتسيطر على كل الأفلام
فين الإسلام ...

والتليفزيون مليان تخاريف

يقولوا عليه فن وتثقيف

ولا فيه إخراج ولا فيه تأليف

وبقينا نشوف أسوأ إعلام
فين الإسلام ...

فين الإسلام والدين مهجور

والشعب حيعمل إيه مقهور

مش لاقي سبيل يهديه للنور

ولأغلى شريعة وأسمى نظام
فين الإسلام ...

فين الإسلام وكتاب الله

محطوط في الدرج وعطلناه

وبقينا على الميت نقراه

ونقول الله الله يا سلام
فين الإسلام ...

فين الإسلام وادي القوانين

معظمها مخالف رأي الدين

ما حناش عارفين على فين رايحين

والدرب طويل والسكة ظلام
فين الإسلام ...

العبء كبير ولازم له دعاه

يهبوا الأرواح في سبيل الله

وينادوا بشرع الله وهداء

وترفرف ع الدنيا الأعلام
فين الإسلام ...

مين غيركم مين يا شباب الجيل

حايشيل الحمل وهوه تقيل

مشوارنا الجاي بعيد وطويل

عايزين يا شباب نمشي لقدام
فين الإسلام ...

خللوا الإسلام للمجد يعود

ونقيم للناس تشريع وحدود

ويعم الخير والعدل يسود

ونقول للناس آدي الإسلام
آدي الإسلام يا أهل الإسلام

بنت الجامعة

ودنك لحظة يا بنت الجامعة

بس يا ريتك صاحية وسامعة

هي نصيحة وقلبي عليكي

عايزك تبقى النور والشمعة

خارجة الصبح ولابسة الموضة

عاملة ف نفسك أجمل زينة

رايحة تتمي هناك تعليمك

ولا حاتقفي في الفترينة؟

ليه بتزيدي النار الوالعة

بس يا ريتك صاحية وسامعة

لابسة ملابس عيب أوصفها

عيب أتكلم كلمة عليها

حاجة بتكشف مش بتغطي

والطلاب زغللتي عنيها

والأصباغ على وشك فاقعة

بس يا ريتك صاحية وسامعة

عاملة زي بتوع السيما

هم المثل الأعلى بتوعك

والتيار لو يعصف بيكي

مش حاتفيد يا بنتي دموعك

ولا حتطفي نارك دمعة

بس يا ريتك صاحية وسامعة

هو العلم مالهش قداسة

ولا الجامعة دي أرض ملاهي

ولا تهتمي بحد يقولك

أي أوامر ولا نواهي

هايفة وكل أمورك مايعة

بس يا ريتك صاحية وسامعة

قلنا كبرتي ورحتي الجامعة

يبقى ده فهمك للحرية؟

تبني إزاي مستقبل بلدك

وانتي هشة ومش مبنية

نازلة بتهوي بغاية السرعة

بس يا ريتك صاحية وسامعة

اللي بيشغل بالك موضة

طالعة جديدة بتجري وراها

ولا رواية تشد عواطفك

تقضي الليل سهرانة معاها

بين ده وبين ده حياتك ضايعة

بس يا ريتك صاحية وسامعة

عايزك تبقى النور الهادي

اللي بينبع من إسلامنا

عايزك تبقي الشمعة القايدة

اللي تنور كل حياتنا

عايزك تبني الأسرة النافعة

بس يا ريتك صاحية وسامعة

عايزك تبقي الأم الواعية

اللي تحافظ على أولادها

تغرس فيهم كل فضيلة

وتقدمهم يحموا بلادها

غرسك وانتي حاتجني الزرعة

بس يا ريتك صاحية وسامعة

عايز يبقى جمالك جوه

نفسك – روحك هم الأولى

أبيض وأحمر ولا باروكة

كل ده إيه حايفيد الدولة

روحك هي الشمس الساطعة

بس يا ريتك صاحية وسامعة

فوقي لنفسك عودي لدينك

هو الحصن اللي حايحميكي

خللي العلم يا بنتي عبادة

تلقى قوام ربنا يهديكي

علمك يبقى سلاح مش صنعة

بس يا ريتك صاحية وسامعة

هي نصيحة وقلبي عليكي

عايزك تبقي النور والشمعة

بناء الإنسان المصري

انطلقت الصيحات وارتفعت الشعارات تنادي بإعادة بناء الإنسان المصري وأعلن كل فريق منهجه وبرامجه ... ولكنهم ضلوا الطريق ولم يهتدوا سواء السبيل ، ذلك لأنهم استوردوا الخطط والمناهج من بلاد غريبة عن الإسلام الذي هو دين الفطرة السمحاء وملاذ البشرية جمعاء فباءت خططهم بالفشل ومناهجهم بالإحباط وسيظل الإنسان المصري تتقاذفه الأهواء كالريشة في مهب الريح حتى يرجع – إلى ربه فيلتزم بمنهجه وشرعه ويقتدي برسوله صلى الله عليه وسلم.

مسكين الإنسان المصري

طول عمره يقاسي ويعاني

كم هدوا كيانه وبنيانه

وأعادوا بناؤه من تاني

عاملينه الناس حقل تجارب

وكأنه متاع مالهوش قيمة

وتجارب فاشلة ومرتجلة

وتملي نتايجها أليمة

ياما قالوا ع الرأسمالية

هي اللي أساس كل حضارة

خدعونا ولا شفناش منها

غير فقر وإقطاع وخسارة

ملايين جمعوها الحرامية

من دم الشعب ومن قوته

وعشان الباشا يعيش باشا

إيه يعني لو 1000 يموتوا

غنى فاحش وقصور مفتوحة

للطبقة الخاصة الموعودة

والتسعة وتسعين في المية

إيدهم لسيادهم ممدودة

الطبقة الراقية المحظوظة

ضاعفت أملاكها وثروتها

واكمن السلطة في إيديها

قوانين الدولة ف خدمتها

خدعوه وجلبوا له اشتراكية

مقدرش المسكين يفهمها

الشعب اعتاد الأنانية

واهتم الفرد بمصلحته

والتاجر أصبح يتحكم

ويسيطر ع السوق بتجارته

الرأسمالية بألاعيبها

مقدرشي المصري يهضمها

قالوا عنها أحسن نظرية

مقفولة علينا ومسدودة

طبقات ما سبقش عرفناها

ظهرت بثراءها وطغياناه

وسجون للشعب المتحفز

فتحت أبوابها وزنازينها

أموال بالملايين صادروها

ومزارع فرضولها حراسة

ومذابح لو مانتش فاكر

اسأل كمشيش أو كرداسة

الفقر الناس ضجت منه

واتوزع ع الشعب بحاله

وفقير امبارح زاد فقره

واتحرم الموسر من ماله

الحاد سموه اشتراكية

هدموا الأخلاق والدين بيها

والشعب اتورط في معارك

ياما الحكام طحنوه فيها

فين هي ثمار النظرية

فين هيه نتيجة تطبيقها

مالقينا إلا خراب كامل

ووعود مش ممكن تحقيقها

جربنا الشرقي والغربي

في بناء الإنسان وفشلنا

ما بلاش نستورد من بره

ونجرب مرة إسلامنا

فيه كل مناهج نحتاجها

ولا نلقى نظام أفضل منه

ليه نقبل مذهب مستورد

وكتاب الله نبعد عنه

فيه كل ما يصلح أنفسنا

إصلاح م الباطن والظاهر

ويخلي الإنسان المصري

ينعم بالمجتمع الطاهر

مجتمع الحب المتبادل

والرحمة وجو الحرية

مجتمع الناس المتعاونة

لسعادة كل البشرية

مجتمع الإنسان المنتج

والإيد الطاهرة الشغالة

والفرصة العادلة المتكافئة

لا تضخم فيها ولا بطالة

مجتمع الإنفاق الواعي

من أجل حاجاته الضرورية

مجتمع المال المتطهر

بزكاة المال الشرعية

مجتمع العزة اللي يحافظ

على أصل تراثه وأمجاده

ويجاهد خصمه اللي يحاول

يتجرأ على أرض بلاده

مجتمع المسجد والمدنة

اللي بيهدونا بأنوارهم

مجتمع الأستاذ والعالم

اللي يغذونا بأفكارهم

رح نرجع إمتى لعقولنا

ونسيب أهواءنا الأرضية

ونعود للمولى اللي خالقنا

ونعيد تعاليمه السماوية

ما كفاية تجارب يا جماعة

ضيعتوا العمر وأيامه

ابنوا الإنسان بس بناؤه

لا بد يقوم على إسلامه

خواطر في ذكرى الإسراء

هجره ومولد وادي الإسرا

ذكرى بتجري وراها الذكرى

لا اتقدمنا ولا اتغيرنا

مين رح يسمع بس ويقرا

هجره عملنا فيها كام حفلة

لجل نصحي الناس م الغفلة

كل غرضنا وكل هدفنا

يمشي الركب وتمشي القافلة

قلنا كلام في الهجرة يشيب

وأساتذتنا كلامهم طيب

لسة لحد اليوم والساعة

فينا العابث والمتسيب

قلنا دروس في الهجرة عظيمة

قلنا مواقف عالية كريمة

إيه نتيجتها وادي الشارع

فيه مليون إعلان للسيما

شفنا رسول الله كم جاهد

شفنا وفاؤه لما يعاهد

فين الأسوة وفين القدوة

وحنا الرقص بقاله معاهد

شفنا رسول الله وكفاحه

لما يشيل على كتفه سلاحه

وادي شبابنا بيعمل هيبز

لما غلبنا من إصلاحه

قلنا كتير في رسول ورسالة

أنقذ ناس من بحر ضلالة

وحنا هجرنا كتابنا وخدنا

شرقي وغربي بكل هبالة

قلنا إزاي عمار بإيمانه

زلزل مكة مع إخوانه

لكن لسة الشعب المسلم

عايش عالة ما خدش مكانه

شفنا أبو بكر بينفق ماله

ولا بيخلي شيء لعياله

أما اليوم فينا اللي بيصرف

تل فلوس لمزاجه وحاله

قلنا كلام في بلال وثباته

دعوة وقدم فيها حياته

لكن شعب بلادنا الغالية

غرقان دايما في ملذاته

برضه حكينا ف ذكرى المولد

واللي انقال في الهجرة اتجدد

هي الناس ما بقوش يهتموا

أو إحساسهم مات واتبلد

شفنا نبينا صباه وشبابه

شفنا النور والخير في ركابه

وحنا ما زلنا في شك وحيرة

من تنفيذ سنته وكتابه

شفنا رسولنا وأدبه العالي

شفنا الجود بالدم الغالي

قلنا وقلنا ورغم ده كله

ناس في صالات بتقضي ليالي

قلنا كلام في خديجة ودورها

بذلت كل اللي ف مقدورها

أما المرأة ف عصر الموضة

ملت الدنيا اليوم بغرورها

قلنا المرأة زمان أوقاتها

كل دقيقة لزوجها وبيتها

والأيام دي ما هش مهتمة

في الدنيا دي غير بزينتها

قلنا شريعة الله ضرورية

ولا فيش غيرها للبشرية

وادي عقول الناس حيرانة

بين شرقية وبين غربية

قلنا حدود الله لازمانا

لجل حقوقنا تكون منصانة

لسه لجان عمالة بتدرس

والتشريع بقى وفق هوانا

وادي الإسرا أهي عادت تاني

جيت ووقفت ف نفس مكاني

واللي أنا قلته يعني حاعيده

ولا بلاش وألم لساني؟

قلنا كتير ولا شيء اتنفذ

حاجة تضايق حاجة تنرفز

دا الإسلام تعاليمه يسيرة

ما فيهاش أبدا حاجة تعجز

الإعلام أهو زي ما هوة

نازل بالأخلاق في الهوة

شايف كيفه عشان الدولة

واقفة وراه سنداه بالقوة

والتعليم دا أمره يحير

ولا شفناش فيه شيء اتغير

فيه الطالب جسمه بيكبر

لكن يطلع عقله صغير

والأخلاق دايما في النازل

جوه نوادي ولا منازل

ليل ونهار شايفين بعنينا

في الأتوبيس والمترو مهازل

والبلاجات مليانة صبايا

ماشية عرايا وشبه عرايا

فتنة كبيرة وآخر الموسم

ألف فضيحة وتل قضايا

لسه البنك بيحسب فايدة

ياما نصحنا ولا فيش فايدة

قلنا بلاش حسابات ربوية

قالوا الفايدة كمان متزايدة

قلنا الرشوة بقالها زباين

واللي مكدب ييجي يعاين

والزارات مليانة مكاتب

فيها قليل الذمة الخاين

قلنا ملاهي الهرم الغوها

كلمة اتقالت ولا سمعوها

سبه وعار في جبين الأمة

لكن لاقية اللي بيحموها

قلنا كتير في بلادنا صحافة

نفسي تبطل مرة سخافة

صورة مثيرة ونكتة بذيئة

ولا توجيه ولا أي ثقافة

والجامعات بنقول ونطالب

خلوا البنت بعيد ع الطالب

ضحكوا وقالوا بلاش رجعية

رد خبيث لذئاب وتعالب

قلنا ف كل مكان إسلامنا

كم بيواجه من أعداءنا

شرق وغرب بيضرب فينا

قاصدين هدم لكل كياننا

قالوا الدين مه مافيهش سياسة

قلنا ما دام ده رأي الساسة

طب خلونا نعيش إسلامنا

ولا دي برضه حاجات حساسة

كل مناسبة نقول ونحذر

هي الناس فاكرين بنهزر؟

واللي بقوله اليوم في الذكرى

كله كلام متعاد ومكرر

جاتنا الإسرا وبيت المقدس

لسه برجل بيجن متنجس

شعب بحاله هناك متشرد

لا بيتحرك ولا يتنفس

والله لو مش رح نتقدم

بكرة حانبكي وحانتندم

واللي سنين بنيناه بإدينا

بيجي في لحظة قوام يتهدم

ذكرى بتيجي وراها الذكرى

مين رح يسمع بس ويقرا


رمضان ... والناس

عجبي عليكو يا مسلمين

يا مؤمنين يا موحدين

تستقبلوا شهر الصيام

وكأنه لعب صغيرين
عجبي

متلهفين تملوا البطون

من كل صنف وكل لون

إسراف قريب م الجنون

وبتبقوا زي المفجوعين
عجبي

عجبي على ساعة الفطار

لحمة وفراخ غير الخضار

ولا حد يبعت يوم لجار

لقمة لعياله المحرومين
عجبي

اللوز مع الجوز والزبيب

شاربينه بالسعر الرهيب

وبنستدين علشان نجيب

جوز هند على بندق وتين
عجبي

أما الكنافة والخشاف

بيقولوا بيقووا الضعاف

وكتير بياكلوا اللقمة حاف

وشهور ما بيدوقوا السمين
عجبي

سوق القطايف في رواج

متحمرة على نار وصاج

معمولة على قد المزاج

وطابور من الناس ملطوعين

وموظفين مديرين كبار

جوه المكاتب بالنهار

قهوه وسجاير والصغار

طبعا معاهم مفطرين
عجبي

وطوال عراض من الشباب

قاعدين في مطعم للكباب

في الضهر ياكلوا في الهباب

بيضحكوا لنا مبسوطين
عجبي

وعلى النواصي التلاجات

والناس تعب مرطبات

سيكو وبيبسي وبالساعات

طول النهار مترصصين
عجبي

ما بقاش بقى شهر الصيام

قلبوه خلاص شهر الطعام

والمسلمين بقى ع الدوام

في الأكل دايما غرقانين
عجبي

ويا ريت على الأكل الكتير

وضياع وحرمات الفقير

لكن بقى الهم الكبير

في مهرجان الفنانين
عجبي

يستقبلوا الشهر الفضيل

بالرقص ع اللحن الجميل

ومسلسلات فيها الدليل

على إنهم ناس مفسدين
عجبي

ليل أو نهار تسمع مذيع

بيذيع في برنامج خليع

وأغاني م النوع الوضيع

للعاشقين والمغرمين
عجبي

أفلام ما فيها – غير فساد

بتهد أخلاق الولاد

وإساءة لكرامة البلاد

وفضيحة بين العالمين
عجبي

والأدهى من ده فيه كمان

فوازير ورا وقت الأذان

جايبينها بالتأكيد عشان

تجرح شعور الصائمين
عجبي

والفنانات جوه الصالات

عاملين لشهر الصوم حاجات

من تابلوهات على أغنيات

من رقاصاتنا العريانين
عجبي

ويقدموا جنب الخمور

للسكرانين وجبة سحور

وموسيقى وي كاسات تدور

بالذمة دول مش خجلانين؟
عجبي

في وسائل الإعلام حشود

ما لهاش في شهر الصوم حدود

وبيبذلوا كل الجهود

في قتل روح المسلمين
عجبي

بيخططوا من غير ضمير

ولا فيش ضوابط للمدير

بالشكل ده الإصلاح عسير

وضروري طرد المجرمين
عجبي

الطاعة قلبوها بفجور

والخير بيتحول شرور

وأملنا في الأزهر يثور

بس المشايخ مكتومين؟
عجبي

ابنك وابني ازاي يصوم

وادي البرامج كل يوم

فيها المفاسد والسموم

تهدم جهود المصلحين
عجبي

رمضان ما هش لعب وفراغ

رمضان ما هش دوشة دماغ

ولا لب يتقزقز بصاغ

يتسلوا بيه السهرانين
عجبي

رمضان عبادة ما هش هزار

وكفاية تهريج ليل نهار

واحموا شبابنا م الدمار

علشان يصد المعتدين
عجبي

مستهترين ليه بالصيام

لا هو شهر لهو ولا طعام

رح تسمعوا إمتى الكلام

ما تفهمونا يا مسئولين؟
عجبي

ده عزو فكري وقفوه

وجهاز ملوث طهروه

والدين مقيد خلصوه

من إيد كبار الملحدين
عجبي

إسلامنا محتاج للدعاة

يتصدوا دايما للغزاة

ويواجهوا إفساد الطغاة

بالنصح والرأي المبين
عجبي

عايزين نصوم عن كل سوء

ع الغيبة عن كل الحقوق

علشان يبان لليل شروق

ونعيش حياة الطائعين
عجبي

عايزين نصوم عن أي زور

وبلاش ظلام ونعيش في نور

ويا ريت كمان ننسى الغرور

ونعود لسيرة الأولين
عجبي

رمضان أتانا فيه كتاب

للجنة يفتح ألف باب

فتناه ورحنا للعذاب

وبقينا إحنا الخسرانين
عجبي

هذا الكتاب دستور عظيم

فيه الطريق المستقيم

والشرع والذكر الحكيم

يهدي الحيارى الغافلين
عجبي

فرصة النهارده الناس تتوب

ويحاولوا تطهير القلوب

والمولى غفار الذنوب

قادر يتوب ع المذنبين
عجبي

يا رب لطفك بالعباد

وأصلح لنا حال البلاد

واهدنا للخير والرشاد

واجعلنا دايما منصورين
عجبي

المستقبل للإسلام

دنيا المذاهب مؤكد شمسها في أفول

وعن قريب جميع الأنظمة حتزول

ومش حايبقى سوى الإسلام لنا على طول

يسعد حياة البشر ويحقق المأمول

نظم صنعها الهوى وتحكم السلطان

يبني ويهدم وعامل لعبته الإنسان

إزاي نلاقي الهدى في مسالك الشيطان

وازاي نحقق أمل في سكة الخسران

الفكر مهما سما – له في النهاية حدود

والعلم مهما بلغ في تقدمه محدود

والتكنولوجيا دي مهما كان لها مجهود

حاتيجي آخر المطاف تلقى الطريق مسدود

الكون دا صنعة مهيمن مقتدر وكبير

يعلم خبايا النفوس وبمخلوقاته خبير

يعرف حاجات البشر والرزق عنده كتير

والأمر أمره وهوه صاحب التدبير

أرسل مئات الرسل ومعاهم الرسالات

للناس عشان يهتدوا بالذكر والآيات

ضلوا طريق الهدى وانغمسوا في الشهوات

والنور في إيدهم وعاشوا ف أحلك الظلمات

فاتوا شريعة السما وهي أمان وسلام

وشرعوا لنفسهم ظلم وهوان وظلام

والناس جميعها اكتوت بمظالم الحكام

ومش حاينفع لهم غير منهج الإسلام

ما حققوش السعادة وإحصاءات بتقول

الانتحار النهارده شيء ما هش معقول

والسرقة والاغتصاب والله دا شرحه يطول

والبعد عن ربنا طبعا هو المسئول

انظر أوربا النهارده من جنوب لشمال

رغم التقدم ورغم الفخفخة والمال

عايشين حياتهم ضياع والناس في أسوأ حال

زنا وخمر وجريمة وعربدة وضلال

أوربا زائد أميركا في اضطراب وشقاء

ظاهر حياتهم نعيم لكنهم بؤساء

عايشين في حيرة وقلق مع إنهم في رخاء

والمادة هي السبب دايما في كل بلاء

وروسيا برضه اللي هية زعيمة الإلحاد

رغم الصناعة ورغم الوفرة والأعداد

الفرد آله وبعد ف خدمة الأسياد

ياكل ويشرب وينجب للبلد أولاد

إياك تصدق شعار العدل والمساواة

أو المواطن هناك له رأي يتبناه

ده ألف مخبر بيتجسس ويمشي وراه

والشعب في جملته ينكر وجود الله

الدولتين الكبار وأوربا في غليان

لا رأسمالي ولا شيوعي صبح في أمان

ما قدموش بالمناهج والنظم إنسان

يحس يوم بالرضا وحلاوة الإيمان

الخالق المقتدر أنزل لنا دستور

عشان ينظم حياتنا بالهدى والنور

والعالم المضطرب بيلف ليه ويدور

بين إديه الدوا – يعني ما هش معذور

طوق النجاة الوحيد في العودة للإسلام

وجربوه قبلنا في سالف الأيام

فتح ممالك وكان أكمل وأسمى نظام

أثبت وجوده وبدد نوره كل ظلام

كل النظم أفلست ولا كان لها تأثير

كانت نتاج العقول والرأي والتفكير

ما لهاش صفات الثبات وتمللي في تغيير

لكن نظام ربنا ما لهوش مثيل ونظير

نظام لدنيا ودين من عند رب الكون

خالق جميع البشر من كل جنس ولون

يعلم خفايا القلوب والسر والمكنون

والملك في قبضته والأمر كن فيكون

إسلامنا مارد بدأ يصحى في كل مكان

رغم الزمان الطويل اللي انقضى في هوان

رغم العذاب اللي شافه من قوى الطغيان

وآدي أقرب مثل – في معجزة إيران

مارد وفتح عينه وانقض ع الظالمين

ع المجرمين اللي حطوا شعبهم في الطين

ع السفاكين اللي قتلوا المسلمين ملايين

ع النصابين اللي جمعوا الثروة بالبلايين

وشوف كمان تركيا بدأت لدينها تعود

دينها العظيم اللي كان بينها وبينه سدود

أتاتورك فين النهارده؟ رمه كلها الدود

عميل مسخر لخدمة أمريكان ويهود

وتحت حبه تاقى مسلمي الأفغان

بيحرروا أرضهم من منكري الأديان

عميل لروسيا لا عنده دين ولا إيمان

فرض إرادته بسيف القهر والطغيان

وخطوتين جنبها بنلاقي باكستان

صبح نظامها يقوم ع السنة والقرآن

وأي شيء يصطدم بشريعة الرحمن

مالوش مكان عندهم في دولة الإيمان

واريتريا المسلمة جاي كل يوم أخبار

عن أرضها اللي انزرع فيها الشرر والنار

عن شعبها اللي انتفض بعزيمة الأحرار

عشان يحرر إرادته ويسحق الكفار

وضد ماركوس رجال حاملين في وجه سلاح

وعقيدة بيقدموا من أجلها الأرواح

والله أكبر بتتردد مسا وصباح

والثورة قدرت تزلزل ماركوس السفاح

على الخريطة الكبيرة لو نظرت تشوف

إسلامنا بيزحف ويتقدم صفوف وصفوف

داخل أوربا وأميركا وغيرها ياما ألوف

في كل يوم يسلموا وده شيء صبح مألوف

دنيا المذاهب مؤكد شمسها في أفول

وعن قريب جميع الأنظمة حتزول

ومش حايبقى سوى الإسلام لنا على طول

يسعد حياة البشر ويحقق المأمول

خاتمة

واختم ديوان الزجل بالحمد والتكبير

للمولى رب النعم والقدرة والتدبير

للي وهبنا النظر والعقل والتفكير

ومهما زاد شكرنا بنحس بالتقصير

دا فضل من ربنا قدرني ع التعبير

وبين إيديك الزجل شامل معاني كتير

مرت بخاطري ونا في السجن كنت أسير

معاني فيها النصيحة وصيحة التحذير

وفيها حفز الهمم للبعث والتحرير

وفيها نقد اجتماعي بس طعمه مرير

وفيها لمحة فكاهة ليها مغزى كبير

وفيها طب القلوب بالصبر ع المقادير

وفيها نور الأمل في الشدة والتكدير

أحداث كبيرة ونا عاجز عن التصوير

يا رب هذا العمل ون كان بسيط وصغير

طالب ينول القبول يا مطلع يا بصير

والقاه في الميزان ولو ان وزنه يسير

وآخر دعوانا أن الحمد لله رب العالمين